इटहरी : कोशी प्रदेशका मुख्यमन्त्री हिक्मत कुमार कार्कीले सशस्त्र प्रहरीले सीमा सुरक्षा, विपद् र शान्ति सुरक्षाको क्षेत्रमा महत्त्वपूर्ण योगदान गरेको बताएका छन् ।
आज सशस्त्र प्रहरी बल नेपाल नम्बर एक बाहिनी मुख्यालय पकली इटहरीमा २४ औँ स्थापना दिवसको अवसरमा आयोजित कार्यक्रममा बोल्दै मुख्यमन्त्री कार्कीले सशस्त्रको गौरवगाथा स्मरणीय रहेको चर्चा गरे ।
सशस्त्र प्रहरीले सीमा क्षेत्रमा बोडरपोस्ट र कतिपय ठाउँमा भवनहरू नभए पनि सीमा सुरक्षामा खेलेको भूमिका अविष्मरणीय रहेको बताउँदै उनले भने, कोरोनाकालमा सीमा क्षेत्रमा र विपद् आउँदा अग्रभागमा खेलेको भूमिकाले सशस्त्र प्रहरी बल महत्वपूर्ण रहेको छ ।
सीमित स्रोत साधनबीच सीमा सुरक्षा गरेर राजस्व वृद्धि गर्न र विपद् व्यवस्थापन काम गरेकोमा प्रशंसा गरे । कतै विपद् भयो भने सशस्त्र प्रहरी रहेको र यसले काम गर्छ भनेर ढुक्क हुने अवस्था रहेको उनले बताए ।
कार्कीले प्रदेश सरकारले ५२ वटा बोडर पोस्ट निर्माण गरेको जानकारी दिँदै आगामी दिनमा थप सहयोग गर्ने प्रतिबद्धता व्यक्त गरे ।
भारतसँग खुला सीमा रहेको आपसी समन्वय गरेर काम गर्दै देशले लाभ लिन सक्नुपर्ने उनले जोड दिए ।
कार्यक्रममा सशस्त्र प्रहरीका प्रहरी नायब महानिरीक्षक (डीआईजी) शम्भु सुवेदीले विभिन्न आरोह, अवरोह पार गर्दै जनताको सेवामा समर्पित रहेको बताए । प्रहरी वरिष्ठ उपरीक्षक (एसएसपी) मनिष थापाले स्वागत मन्तव्य व्यक्त गरेका थिए ।
Discussion about this post