इटहरी : नेपालको संविधान जारी भएको एक दशक बित्न लाग्दा पनि संघीय निजामती सेवा ऐन हालसम्म नआएकाले कर्मचारीहरू आन्दोलित भएका छन्।
०८० फागुन २१ गते प्रतिनिधिसभामा दर्ता भएको विधेयकमाथि पटकपटक छलफल भए पनि ऐन पारित नहुँदा सरकारी कर्मचारीहरू आन्दोलनमा उत्रिएका हुन्।
एकीकृत सरकारी कर्मचारी संगठन सुनसरीका इञ्चार्ज रविन घिमिरेकाअनुसार नागरिकमैत्री र कर्मचारीमैत्री ऐन सुनिश्चित गर्न देशैभर संयुक्त ट्रेड युनियन सञ्जालको अगुवाइमा आन्दोलन अघि बढाइएको हो।
आन्दोलनको क्रममा सुनसरीका विभिन्न कार्यालयमा कार्यरत निजामती कर्मचारीहरूले हातमा कालोपट्टी बाँधेर सिर्जनात्मक विरोध जनाएका छन्।
“प्रस्तावित संघीय निजामती सेवा ऐन शीघ्र जारी गर्न माग गर्दै जेठ २५ गतेदेखि कार्यालय समयमै कालोपट्टी बाँधेर विरोध जनाइरहेका छौँ,” इञ्चार्ज घिमिरेले भने। उनका अनुसार आन्दोलन अर्को निर्णय नभएसम्म निरन्तर चल्नेछ।
सेवा प्रवाहमा भने कुनै अवरोध नरहेको स्पष्ट पार्दै उनले भने, “हामी नागरिक सेवा प्रवाहमा बाधा नपुर्याउने गरी जिम्मेवार ढंगले आन्दोलन गरिरहेका छौं।”
संघीय निजामती सेवा ऐनको अभावमा वृत्ति विकास, पदोन्नति, सेवा सुरक्षा लगायतका विषय अन्योलमा परेको भन्दै कर्मचारीहरू असन्तुष्ट छन्। उनीहरूले संघ, प्रदेश र स्थानीय तहमा कार्यरत कर्मचारीहरूको मनोबल उच्च राख्न र सेवाप्रवाह प्रभावकारी बनाउन ऐनमा स्पष्ट र व्यवहारिक व्यवस्था गर्नुपर्ने माग राखेका छन् ।
Discussion about this post