धरान : धरानस्थित बीपी कोइराला स्वास्थ्य विज्ञान प्रतिष्ठानले नयाँ प्रविधिमार्फत उपचार सेवा विस्तार गरेको छ।
प्रतिष्ठानले दीर्घकालीन पीडाको उपचारका लागि रेडियोफ्रिक्वेन्सी एब्लेशन सेवा (आरएफए) र हाडजोर्नी सम्बन्धी रोगको प्रारम्भिक पहिचानका लागि हड्डीको घनत्व परीक्षण गर्ने (डीइएक्सए) सेवा सञ्चालनमा ल्याएको हो।
एनस्थेसियोलोजी विभागको पहलमा प्रतिष्ठानले पहिलो पटक रेडियोफ्रिक्वेन्सी एब्लेशन सेवा सुरु गरेको प्रतिष्ठानले जनाएको छ। यस प्रविधिबाट विशेषगरी ट्राइजेमिनल न्यूराल्जियाजस्ता स्नायु रोगको उपचार सम्भव भएको छ।
पहिलो परीक्षणमा ट्राइजेमिनल न्यूराल्जिया भएका बिरामीको ग्यासेरियन ग्याङ्ग्लियनमा रेडियोफ्रिक्वेन्सी एब्लेशन सफलतापूर्वक सम्पन्न भएको प्रतिष्ठानले जनाएको छ। अनुहारमा असह्य बिझाउने वा चुडिएको जस्तो पीडा हुने यस रोग सामान्य औषधिले निको नहुने भएकाले उक्त सेवा प्रभावकारी विकल्प मानिन्छ।
फ्लोरोस्कोपी प्रविधि प्रयोग गरेर हुने यो प्रक्रिया सटीक र सुरक्षित हुने बताइएको छ। यसले मेरुदण्ड, घुँडा, काँध, आथ्राइटिसजन्य पिडा, ओसिपिटल न्यूराल्जिया, क्यान्सरजन्य पीडा तथा शल्यक्रियापछि बाँकी रहने पीडामा समेत उपयोगी हुने चिकित्सकहरू बताउँछन्।
सही बिरामी छनोट र विशेषज्ञताको प्रयोग भएमा यसले लामो समयसम्म पीडाबाट राहत दिलाउने र औषधि सेवन कम गर्ने सुविधा मिल्छ।
प्रतिष्ठानले यो सेवा सुरु गर्नु पूर्वी नेपालमा दीर्घकालीन पीडा व्यवस्थापनमा नयाँ अध्याय भएको जनाएको छ।
हाडजोर्नी विभागको ओपीडीमार्फत प्रतिष्ठानले डीइएक्सए सेवा पनि सुरु गरेको छ। यस प्रविधिबाट हड्डीको घनत्व मापन गर्न सकिन्छ, जसले हड्डी कमजोर हुने रोगको प्रारम्भिक अवस्थामा नै पत्ता लगाउन मद्दत गर्छ।
उमेर बढ्दै जाँदा वा कतिपय अवस्थामा कम उमेरमै हड्डी कमजोर हुने समस्या देखिने भएकाले डीइएक्सए स्क्यान प्रभावकारी परीक्षण हुने चिकित्सकहरूको भनाइ छ। समयमै निदान गरी उपचार गरे बिरामीलाई गम्भीर अवस्थाबाट जोगाउन सकिने विश्वास लिइएको छ।
हाल यो परीक्षण हरेक दिन उपलब्ध हुने र परीक्षण शुल्क सम्बन्धी विवरण प्रतिष्ठानले जारी गरेको परिपत्रअनुसार लागु हुने जनाएको छ।
प्रष्तिठानका सह–प्रवक्ता डा. अभिजीत कुमारका अनुसार नवीनतम प्रविधिमार्फत बिरामीलाई उत्कृष्ट उपचार सेवा पुर्याउने उद्देश्य लिइएको छ। यी दुई सेवाले बिरामी उपचारमा थप सहजता ल्याउने अपेक्षा गरिएको उनले बताए।
Discussion about this post