इटहरी : जेन-जी आन्दोलनका क्रममा कोशी प्रदेशमा मृत्यु हुनेको संख्या १० पुगेको छ ।
तर मृतकमध्ये पाँच जनाको मात्र सनाखत भएको र बाँकी पाँच जनाको अहिलेसम्म पहिचान खुल्न नसकेको प्रहरीले जनाएको छ ।
प्रदेश प्रहरी प्रवक्ता एसएसपी दीपक पोखरेलका अनुसार मृतक परिवार वा आफन्तले शव दाबी नगरेकाले पहिचानमा ढिलाइ भइरहेको हो ।
“१० जनाको मृत्यु भएको पुष्टि भएको छ । ५ जनाको पहिचान भइसकेको छ । तर ५ जनाको अहिलेसम्म दाबी भएको छैन,” उनले भने ।
उनका अनुसार झापाको बिर्तामोडमा अर्जुनधारा–११ का ३० वर्षीय गोपाल सेढाईं, अर्जुनधारा–८ का ३२ वर्षीय दिनेश राजवंशी, पाँचथर हिलिहाङ–५ का ३० वर्षीय कमल भण्डारी, इटहरी–१६ का २३ वर्षीय अभिषेक श्रेष्ठ र इटहरी–१४ का मोहन सरदारको मृत्यु भएको पुष्टि भइसकेको छ ।
तर भाटभटेनीमा मृत्यु भएका पाँच जनाको हालसम्म शवको पहिचान नभएको प्रहरीले जनाएको छ । धरानस्थित भाटभटेनी सुपरमार्केटमा आगजनीका क्रममा चार जनाको जलेको अस्तु मात्र भेटिएको छ ।
त्यसैगरी सोमबार विराटनगरस्थित भाटभटेनीमा जलेको मानव कंकाल फेला परेको छ, जसको पहिचान अझै खुलेको छैन ।
मृतकहरू भाटभटेनीका कर्मचारी नरहेको र आन्दोलनका क्रममा तोडफोड तथा लुटपाट गर्ने क्रममा जलेर मृत्यु भएको हुनसक्ने प्रारम्भिक अनुसन्धानबाट खुलेको प्रहरीले बताएको छ ।
सो आन्दोलनका क्रममा १ सय १४ जना प्रहरी घाइते भएका छन् । तीमध्ये ५ जनाको अवस्था गम्भीर, ५७ जनाको अवस्था मध्यम रहेको र बाँकी उपचारपछि ड्युटीमा फर्किएको प्रवक्ता पोखरेलले जानकारी दिए ।
आन्दोलनकारीतर्फ कम्तीमा ४६ जना घाइते भएको प्रारम्भिक विवरण आएको छ, तर यो संख्या अझै बढ्न सक्ने अनुमान गरिएको छ ।
भदौ २३ र २४ गते भएको आन्दोलनका क्रममा कोशी प्रदेशका विभिन्न ठाउँमा झडप, आगजनी र तोडफोड भएका थिए ।
प्रहरीले विभिन्न ठाउँमा जलेका भौतिक संरचनाको मुचुल्का उठाएर क्षतिको विवरण संकलन भइरहेको जनाएको छ ।
Discussion about this post