मोरङ : प्रतिनिधिसभा सदस्य निर्वाचन नजिकिँदै गर्दा मोरङमा सुरक्षा निगरानी तीव्र पारिएको छ।
निर्वाचन प्रभावित पार्ने आशंकामा दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’सँग आबद्ध तीन जना नेता–कार्यकर्ता पक्राउ परेका छन्।
पक्राउ पर्नेमा बूढीगंगा गाउँपालिका–७ का ४७ वर्षीय डोलेश्वर रेग्मी, पथरीशनिश्चरे नगरपालिका–३ का ६३ वर्षीय सूर्य चौधरी र ५८ वर्षीय चूडामणि राई रहेका छन्। प्रहरीका अनुसार रेग्मी मोरङ जिल्ला संयोजक हुन् भने चौधरी र राई कार्यकर्ता हुन्।
मोरङ प्रहरीका प्रवक्ता डीएसपी हरिनन्दन चौधरीले निर्वाचनविरोधी गतिविधि सञ्चालन गरी चुनाव बिथोल्ने सम्भावना देखिएकाले उनीहरूलाई नियन्त्रणमा लिएको बताए। उनीहरुविरुद्ध अभद्र व्यवहारसम्बन्धी कसुरमा मुद्दा दर्ता गरी म्याद थपेर अनुसन्धान अघि बढाइएको छ।
यसअघि निर्वाचन आयोगको पत्राचारपछि प्रसाईं स्वयंलाई पनि निर्वाचन भाँड्ने गतिविधिको आरोपमा काठमाडौंबाट पक्राउ गरिएको थियो। तर सर्वोच्च अदालतले बिना पर्याप्त आधार थुनामा राखिएको भन्दै रिहा गर्न आदेश दिएपछि उनी रिहा भएका थिए।
मोरङ प्रहरी प्रमुख एसपी कवित कटवालले निर्वाचन अवधिभर शंकास्पद गतिविधिमाथि विशेष निगरानी राखिएको र शान्तिपूर्ण मतदान सुनिश्चित गर्न बहु–स्तरीय सुरक्षा रणनीति लागू गरिएको बताए।
उनले सर्वसाधारणलाई निर्वाचनविरोधी गतिविधि वा उक्साहटसम्बन्धी सूचना भए तुरुन्त सुरक्षा निकायलाई जानकारी गराउन आग्रहसमेत गरे।
Discussion about this post