इटहरी : सुनसरी जिल्ला प्रशासन कार्यालयले हरिनगर र देवानगञ्ज गाउँपालिकाको सम्पूर्ण क्षेत्रमा निषेधाज्ञा जारी गरेको छ।
प्रमुख जिल्ला अधिकारी बासुदेव घिमिरेले जिल्ला सुरक्षा समितिको निर्णयका आधारमा स्थानीय प्रशासन ऐन, २०२८ को दफा ६ को उपदफा ३(क) बमोजिम सोमबार (आज) बिहान ७ बजेदेखि साँझ ७ बजेसम्म लागू हुने गरी निषेधाज्ञा जारी गरिएको जानकारी दिए।
आदेशअनुसार उक्त अवधिमा एकै स्थानमा पाँच जनाभन्दा बढी व्यक्ति भेला हुन, जमघट गर्न वा समूहमा उपस्थित हुन पाइने छैन।
जिल्ला प्रशासन कार्यालयले निषेधाज्ञाको उल्लङ्घन गरे प्रचलित कानुनबमोजिम कारबाही गरिने जनाएको छ। आदेश उल्लङ्घन गर्नेलाई जरिवाना तथा एक महिनासम्म कैद हुन सक्ने चेतावनीसमेत दिइएको छ।
कप्तानगञ्ज क्षेत्रमा दुई समूहबीच भएको हिंसात्मक झडप र त्यसपछि उत्पन्न तनावलाई मध्यनजर गर्दै सुरक्षा अवस्था सामान्य बनाउन निषेधाज्ञा जारी गरिएको प्रशासनको भनाइ छ।
जिल्ला प्रशासनले सर्वसाधारणलाई आदेशको पालना गर्न र शान्ति–सुरक्षा कायम राख्न सहयोग गर्न आग्रह गरेको छ।
Discussion about this post