इटहरी : सुनसरीको इनरुवा निवासी सीमा अभियन्ता तथा साहित्यकार गोपाल कोइराला ‘त्यागी’को जीवन, संघर्ष र योगदानमा आधारित पुस्तक ‘एउटा अथक योद्धा गोपाल कोइराला ‘त्यागी’’ शनिबार काठमाडौंमा लोकार्पण गरिएको छ।
महेश प्रसाईं र तेजेन्द्र प्रसाईंद्वारा सम्पादित तथा किरण कोइराला ‘हमला’द्वारा प्रकाशित उक्त कृतिको पिङ्गलास्थानस्थित बेस्ट वेस्टर्न प्लसमा आयोजित विशेष समारोहमा लोकार्पण गरिएको हो। कार्यक्रमसँगै ८७ वर्षीय कोइरालालाई सीमा संरक्षण र साहित्य क्षेत्रमा पुर्याएको योगदानको कदर गर्दै विभिन्न ११ साहित्यिक तथा सामाजिक संस्थाले संयुक्त रूपमा अभिनन्दनसमेत गरेका छन्।
बानेश्वर बहुमुखी क्याम्पसको बानेश्वर सर्जक समाजको आयोजनामा भएको कार्यक्रममा प्रमुख अतिथि पूर्वसचिव डा. द्वारिकानाथ ढुङ्गेलले कोइरालालाई सीमा संरक्षणमा निरन्तर सक्रिय राष्ट्रसेवी व्यक्तित्वका रूपमा चित्रण गर्दै उनको योगदान राज्यका लागि महत्वपूर्ण रहेको बताए।
इतिहासविद् डा. सुरेन्द्र केसीले कोइरालाले तीन दशकदेखि सीमा क्षेत्रको अध्ययन र संरक्षणमा निरन्तर काम गर्दै हराएका धेरै भूभाग देशको नाममा फिर्ता ल्याउन भूमिका खेलेको उल्लेख गरे।
लोकार्पित कृतिमाथि टिप्पणी गर्दै डा. हरि सिलवालले गोपाल कोइराला ‘त्यागी’का योगदानलाई भावी पुस्तासम्म पुर्याउन उनका कृतिहरू विद्यालय र पुस्तकालयसम्म पुग्नुपर्ने धारणा राखे। समालोचक गोपी मैनालीले पनि कोइरालाको राष्ट्रसेवा र साहित्यिक योगदानको प्रशंसा गर्दै उनको दीर्घायुको कामना गरे।
अभिनन्दित व्यक्तित्व गोपाल कोइराला ‘त्यागी’ले सम्मानप्रति आभार व्यक्त गर्दै आफू अझै समाज र राष्ट्रका लागि सक्रिय रहने प्रतिबद्धता जनाए।
कार्यक्रममा प्रा. खेम कोइराला बन्धु, युवराज मैनाली, ठाकुर शर्मा भण्डारी, डा. विनोद मञ्जन, डा. घमानसिंह खड्कालगायतले शुभकामना मन्तव्य राखेका थिए। कार्यक्रमको सञ्चालन प्रकाश समीरले गरेका थिए।
प्रेरणादायी व्यक्तित्व कोइरालाको जीवनसंघर्ष, योगदान र व्यक्तित्वमाथि आधारित पुस्तक ‘एउटा अथक योद्धा’मा विभिन्न लेखकहरूको लेख समावेश छ।
उक्त कृतिमा उनको जीवनयात्रा, संघर्ष, सामाजिक योगदान तथा प्रेरणादायी अनुभवहरू समेटिएको छ। ‘त्यागी’ले समाज रूपान्तरण, मानवीय सेवा र सामाजिक अभियानमा महत्वपूर्ण योगदान पुर्याएका छन्।
Discussion about this post