ग्रामथान : मोरङको ग्रामथान–६ स्थित भरचोलगढीमा सम्पन्न तेस्रो मन्जिल स्मृति रानीगढी रनिङ कप फुटबल प्रतियोगिताको उपाधि आयोजक मन्जिल रानीगढी क्लबले जितेको छ ।
सोमबार सम्पन्न फाइनल खेलमा ब्ल्याक डायमण्ड एफसीलाई १–० गोलअन्तरले पराजित गर्दै आयोजकले उपाधि जितेको हो । आयोजकका उमेश कार्कीले दोस्रो हाफमा गरेको एक मात्र गोल निर्णायक बनेको थियो ।
उपाधिसँगै मन्जिल रानीगढी क्लबले ट्रफी, मेडल र प्रमाणपत्रसहित नगद ५१ हजार रुपैयाँ प्राप्त गरेको छ । उपविजेता ब्ल्याक डायमण्ड एफसीले ट्रफी, मेडल र प्रमाणपत्रसहित ३१ हजार रुपैयाँमा चित्त बुझाएको छ ।
फाइनल खेलमा आयोजकका अनिल राजधामी म्यान अफ द म्याच घोषित भए । प्रतियोगिताको उत्कृष्ट खेलाडी आयोजकका अभिषेक मण्डल घोषित हुँदा सर्वाधिक गोलकर्ताको उपाधि अनिश राजधामीले पाए ।
त्यस्तै, उत्कृष्ट गोलरक्षक आयोजकका अर्जुन चौधरी, उत्कृष्ट फरवार्ड ब्ल्याक डायमण्ड एफसीका हरि खवास, उत्कृष्ट मिडफिल्डर आयोजकका उमेश कार्की र उत्कृष्ट डिफेन्डर किरण चौधरी घोषित भए ।
प्रतियोगिताका विजेता तथा उपविजेता टोलीका खेलाडीलाई समापन समारोहका प्रमुख अतिथि ग्रामथान गाउँपालिकाका अध्यक्ष नमो नारायण माझीलगायत अतिथिहरूले ट्रफी, मेडल तथा प्रमाणपत्र वितरण गरे ।
समापन समारोहमा ग्रामथान गाउँपालिका–६ का वडाध्यक्ष वीर नारायण चौधरी, वडा सदस्य निलम सरदार, कोशी प्रदेश खेलकुद विकास बोर्डका सदस्य तथा थारु कल्याणकारिणी सभा मोरङका जिल्ला सभापति प्रदीप भगत थारु, पूर्व राष्ट्रिय भलिबल खेलाडी नन्दकुमार सरदार, पूर्व राष्ट्रिय फुटबल खेलाडी देवनारायण चौधरी, मुख्य प्रायोजकसमेत रहेकी आयोजक क्लबकी उपाध्यक्ष उपकार मण्डल र क्लबका कोषाध्यक्ष मनोज मण्डललगायतको उपस्थिति थियो ।
क्लबका अध्यक्ष कृष्णकुमार मण्डलको अध्यक्षतामा सम्पन्न समापन समारोहमा प्रतियोगितालाई सफल बनाउन सहयोग गर्ने सबैलाई धन्यवाद दिइएको थियो ।
मन्जिल रानीगढी क्लबको आयोजनामा असोज १५ गतेदेखि सुरु भएको प्रतियोगिता भव्य रूपमा सम्पन्न भएको क्लबकी उपाध्यक्ष उपकार मण्डलले बताइन् ।
Discussion about this post