इटहरी : इटहरी उपमहानगरपालिका–७ सुमङ्गल टोलमा केही समयको अन्तरमा श्रीमान्–श्रीमतीको मृत्यु भएको छ । शनिबार साँझ ५७ वर्षीय रामु चौधरी र उनकी ५१ वर्षीया श्रीमती कञ्चन चौधरीको केहीबेरको अन्तरमा मृत्यु भएको हो ।
परिवारका अनुसार उनीहरू बिहीबार बेलुका माछा खाएका थिए । बाँकी रहेको माछा शुक्रबार बिहान पनि खाएका थिए । त्यसपछि परिवारका तीनै जना बिरामी परेको छोरी सुमिनाले बताइन् ।
उनका अनुसार शुक्रबारदेखि आफूलाई ज्वरो आएको थियो । बुबालाई ज्वरो र बान्ता भएको थियो भने आमालाई शनिबार बिहानदेखि बान्ता र पखाला लागेको थियो ।
शनिबार बिहान जिउ दुखेको भन्दै रामु काममा गएका थिएनन् । घरमै रहेका उनलाई बान्ता भएपछि आराम गर्न ओछ्यानमा गएका बेला मृत्यु भएको थियो । बुबाको अवस्था हेर्न पुगेकी कञ्चन पनि केहीबेरमै ढलेकी थिइन् ।
आमाबुबा दुवैलाई बेहोस अवस्थामा देखेपछि सुमिनाले दाजु सुनिललाई खबर गरेकी थिइन् । आफन्त र छिमेकीको सहयोगमा कञ्चनलाई एम्बुलेन्समार्फत विराट शिक्षण अस्पताल पुर्याइए पनि चिकित्सकले मृत घोषणा गरेका थिए ।
बिरामी सुमिनाको इटहरीस्थित एक मेडिकलमा उपचार गरिएको थियो ।
इटहरी–७ का वडा सदस्य दीपक घिमिरेका अनुसार रामुलाई उच्च रक्तचाप र कञ्चनलाई मधुमेहको समस्या थियो । दम्पतीको मृत्युको कारण भने आधिकारिक रूपमा पुष्टि भएको छैन ।
परिवारले खाएको माछा दूषित थियो वा त्यसकै कारण उनीहरू बिरामी परेका हुन् भन्ने पनि पुष्टि हुन बाँकी छ । यसबारे स्वास्थ्य निकायबाट परीक्षण वा अनुसन्धान भएको विवरण प्राप्त भएको छैन ।
दम्पतीको शव घरमा ल्याइएको छ । टाढाका आफन्त आएपछि दाहसंस्कार गर्ने तयारी रहेको रामुका दाजु महादेव चौधरीले बताए ।
Discussion about this post