धरानमा सम्पन्न बुढासुब्बा गोल्डकपको उपाधि मनाङलाई

धरान : २२ औँ अन्तराष्ट्रिय आमन्त्रण बुढासुब्बा गोल्डकपको उपाधि एनओसी मनाङ मस्र्याङ्दी क्लबले चुमेको छ ।
शनिबार धरान रंगशालामा सम्पन्न भएको बुढासुब्बा गोल्डकपको उपाधिका लागि मनाङ र विभागीय टिम नेपाल पुलिस बीच भिडन्त भएको थियो । मनाङले ३ गोल गर्दा पुलिसले बदलामा १ गोल मात्रै फर्काएसँगै मनाङले उपाधि चुमेको हो । मनाङका दयानन्द सिंह, निशान लिम्बु र बिमल रानाले गोल गर्दा पुलिसका भोला सिलवालले पेनाल्टी मार्फत गोल गरे ।
खेल सुरु भएको १० औँ मिनेटमा नै मनाङका दयानन्द सिंहले पुलिसका गोल किप्पर सञ्जित श्रेष्ठको मिस्टेकले गर्दा गोल गरेका थिए । त्यस्तै ४९ औँ मिनेटमा बिमल रानाको पासमा निशान लिम्बुले उत्कृष्ट गोल गरे भने खेलको इन्जुरी समयमा बिमलले अर्को गोल गर्दै मनाङलाई उपाधि दिलाए । उता पुलिसका भोला सिलवालले खेलको ६७ औँ मिनेटमा पेनाल्टीमार्फत गोल गरे । पहिलो हाफपछि आक्रमक बनेको पुलिसले पटक–पटक गोल गर्ने प्रयास गरेपनि गोल गर्न सकेन । खेलको २२ औँ मिनेटमा पुलिसका साजन राईको उत्कृष्ट प्रहार गोलमा रुपान्तरण हुन सकेन । त्यस्तै, खेलको २७ औँ मिनेटमा भोला सिलवालको प्रहार गोल हुन सकेन । उता, मनाङले खेलमा धेरै पटक मौका गुमाएको भएपनि अन्य थप गोल गर्न सकेन । खेलको ४ औँ मिनेटमा अन्जन बिष्टको प्रहार गोलमा रुपान्तरण हुन सकेन । ३८ मिनेटमा बिमल रानाको उत्कृष्ट प्रहार गोल भएन । त्यस्तै, ७८ औँ मिनेटमा कमल श्रेष्ठले कर्नरमार्फत उत्कृष्ट प्रहार गरेको भएपनि गोलमा रुपान्तरण हुन सकेन ।
खेलको म्यान अफ दि म्याच मनाङका अन्जन बिष्ट घोषित हुँदै नगद १५ हजार हात पारे भने बेष्ट गोल अफ दि डे मनाङका बिमल राना घोषित भए । उनले नगद पाँच हजार हात पारे ।
खेलको बिजेता टिम मनाङले नगद १० लाख सहित ट्रफि हात पारेको छ भने उपविजेता पुलिस क्लबले ५ लाखमा चित्त बुझाएको छ । विजेता टिमलाई कार्यक्रमका प्रमुख अतिथि प्रदेश १ का मुख्यमन्त्री शेरधन राईले पुरस्कार वितरण गरेका थिए ।
खेलमा मनाङका कोच फुजा टोपे बेष्ट कोच घोषित भए । त्यस्तै, सर्वा्धिक गोलकर्ता मनाङका दयानन्द सिंह घोषित हुँदै नगद ३५ हजार हात पारे । त्यस्तै, मनाङका सुरज विक सर्वोत्कृष्ट खेलाडी घोषित हुँदै एक थान स्कुटर हात पारे । बेष्ट गोल किप्पर मनाङका अशोक बराल घोषित हुँदै नगद २५ हजार हात पारे । बेष्ट डिफेन्डर पुलिसका सुमन सुवेदी घोषित हुँदै नगद २५ हजार हात पारेका थिए । त्यस्तै, बेष्ट मिट फ्रिल्डर मनाङका पुजन उपरकोटी घोषित हुँदै नगद २५ हजार हात पारे । त्यस्तै, पुलिसका जुमानु राई बेष्ट फरवार्ड घोषित हुँदै नगद २५ हजार हात पारे ।
आयोजक धरान फुटबल क्लबका अध्यक्ष किशोर राईले बुढासुब्बा गोल्डकप २२ औँ संस्करण सम्म ल्याइपुर्याउनका लागि चुनौती रहेको भएपनि आँफूहरुले निरन्तर खटेको बताउँदै आगामी दिनमा यसलाई अझ भव्य बनाउँने प्रतिक्रिया दिए ।