बुढासुब्बा गोल्डकप फागुन १० देखि, पुरस्कार राशी १० लाख

धरान

मोफसलको सबैभन्दा ठूलो फुटबल प्रतियोगिता बुढासुब्बा गोल्डकपको २२ औँ संस्करण आगामी फागुन १० गतेदेखि धरानमा हुने भएको छ । धरान फुटबल क्लबले बिहीबार धरानमा पत्रकार सम्मेलन गर्दै २२ औँ संस्करण फागुन १० गतेदेखि हुने जानकारी दिएको हो । क्लबका अध्यक्ष तथा अखिल नेपाल फुटबल सङ्घ (एन्फा) का प्रदेश अध्यक्ष किशोर राईले देश विदेशका गरी आठ वटा टिम सहभागी हुने जानकारी दिए । एन्फाले बुढासुब्बा गोल्डकपलाई ‘क’ श्रेणीमा राखेपछि प्रतियोगिताको पुरस्कार राशि समेत बढाइएको छ, राईले पत्रकार सम्मेलनमा भने, विजेतालाई १० लाख र उपविजेतालाई पाँच लाख दिईने निर्णय भएको छ ।
राईका अनुसार अघिल्लो संस्करणमा विजेतालाई आठ लाख र उपविजेतालाई चार लाख दिइएको थियो ।
त्यस्तै, उत्कृष्ट खेलाडीलाई डियो स्कुटी एक थान दिइनेछ भने प्रत्येक खेलको म्यान अफ दि म्याचले नगद १५ हजार हात पार्नेछन् । उत्कृष्ट किपर, उत्कृष्ट डिफेन्स, उत्कृष्ट मिडफिल्डर, उत्कृष्ट स्ट्राइकर र उत्कृष्ट कोचले जनही नगद २५ हजार पुरस्कार पाउँने आयोजकले बताएको छ । त्यस्तै, सर्वाधिक गोलकर्ताले नगद ३५ हजार पाउँनेछन् । प्रतियोगितामा ७४ लाख ५५ हजार खर्च हुने अनुमान गरिएको छ ।
खेलमा मनाङ मस्र्याङ्दी क्लब, मच्छिन्द्र क्लब, नेपाल पुलिस क्लब, युके एफसी, भारत, जापान फुटबल लिग टिम, बेलबारी फुटबल क्लब, मेची नेत्रालय काँकडभिट्टा फुटबल ट्रेनिङ सेन्टर र आयोजक धरान फुटबल क्लब मैदानमा उत्रने आयोजकले जनाएको छ ।
१७ गतेसम्म हुने प्रतियोगिता धरान १६ स्थित धरान रंगशालामा हुनेछ ।