धरान : धरानमा जारी २२ औँ अन्तर्रा्ष्ट्रिय आमन्त्रण बुढासुब्बा गोल्डकपको तेस्रो दिन (सोमबार) भएको क्वाटरफाइनल खेलमा एनओसी मनाङ मस्र्याङ्दी क्लब र बेलबारी फुटबल क्लब बीच भएको खेलमा बेलबारी फुटबल क्लब स्तब्ध भएको छ ।
मनाङले ४ गोल गर्दा बेलबारीले एक गोल पनि बदलामा फर्काउन सकेन । पहिलो हाफको२४ औँ मिनेटमा मनाङका अन्जान बिष्टले दिएको पासमा निशान लिम्बुले गोल गरे ।
त्यस्तै, पहिलो हाफको ४३ औँ मिनेटमा बिमल रानाले हेडिङमार्फत शानदार गोल गरेका थिए । त्यस्तै, दोस्रो हाफको ७ औँ मिनेटमा अन्जान बिष्टले दिएको पासमा दयानन्द सिंहले गोल गरे ।
त्यस्तै, दोस्रो हाफको २१ औँ मिनेटमा अन्जान बिष्टकै पासमा दयानन्द सिंहले अर्को गोल गर्न सफल भए । उक्त सयमअवधि भरीमा बेलबारीले कुनै गोल फर्काउन नसक्दा स्तब्ध बन्यो । यो जित सँगै मनाङ सेमिफाइनलमा प्रवेश गरेको छ ।
खेल अवधिमा बेलबारीले गोल गर्ने मौका पाएपनि गोल गर्न सफल भएन । दोस्रो हाफको ११ औँ मिनेटमा बेलबारीका बिनोद अधिकारीलेउत्कृष्ट प्रहार गरेपनि गोलमा परिणत हुन सकेन । त्यस्तै, दोस्रो हाफको ३५ औँ मिनेटमा उमेश कार्कीले उत्कृष्ट प्रहार गरेपनि उक्त प्रहार पनि गोल हुन सकेन ।
खेलमा मनाङले थुप्रैपटक मौका पाएपनि किप्परले रोक्न सफल भए । पहिलो हाफको २१ औँ मिनेटमा मनाङका पारस खत्रीले प्रहार गरेको गोल बेलबारीका गोलकिप्पर बिष्णु चौधरीले रोक्न सफल भए । त्यस्तै, दोस्रो हाफको १३ औँ मिनेटमा रञ्जन बिष्टले गरेको प्रहार गोलमा परिणत हुन सकेन ।
सोमबारको खेलको म्यान अफ दि म्याच दयानन्द सिंह भए । उनले नगद १५ हजार हात पारे भने बेष्ट गोल गर्ने खेलाडी निशान लिम्बु भए उनले ५ हजार नगद हात पारेका थिए ।
खेलको बिजेता टिमले नगद १० लाखसहित ट्रफि हात पार्नेछन् भने उपविजेता टिमले ५ लाखमा चित्त बुझाउँनेछ ।
खेलमा ८ वटा टिम सहभागी भएका थिए भने भोलि (मंगलबार)को अन्तिम क्वाटरफाइनल खेल मछिन्द्र क्लब काठमाडौँ र एफबीसीसी कलकत्ता बीच हुने आयोजक धरान फुटबल क्लबले जनाएको छ ।
यसअघि शनिबार भएकोउद्घाटन खेलमा भारतको दार्जिलिङ युनाइटेड करसाङ फुटबल क्लबले आयोजक धरान फुटबल क्लबलाई पराजित गरी सेमिफाइनलमा प्रवेश गरेको छ भने आइतबार भएको दोस्रो खेलमा बिभागिय टिम नेपाल पुलिस क्लबले मेची नेत्रालय काँकडभिट्टा फुटबल ट्रेनिङ सेन्टर झापालाई पराजित गर्दै सेमिफाइनलमा प्रवेश गरेको छ ।
Discussion about this post