इटहरीको पानीपियामा धरानले फेरी राख्यो सीमा प्रारम्भको बोर्ड

इटहरी : धरान उपमहानगरपालिकाले तरहराको पानीपियामा फेरि ‘सीमा प्रारम्भ’ अंकित बोर्ड राखेको छ । धरान उपमहानगर प्रमुख हर्क साम्पाङको निर्देशनमा नगर प्रहरीको टोलीले सोमबार बिहान बोर्ड राखेको हो ।

दुई उपमहानगरको विवाद कायम रहेकै बेला कुनै छलफल र समन्वय नगरी धरानले बोर्ड राखेको हो । केही महिनाअघि धरानले त्यही ठाउँमा बोर्ड राख्दा नेकपा एमालेनिकट राष्ट्रिय युवा संघ इटहरीले निकालेर फालिदिएको थियो ।

धरान नगर प्रहरी विष्णु कोइरालाको नेतृत्वमा आएको टोलीले कोशी राजमार्गअन्तर्गत सेउती खोलामा राखिएको नेपाल प्रहरीको बोर्ड पनि हटाएको छ ।

इटहरी र धरान प्रहरीले आफ्नो सीमा क्षेत्र प्रारम्भ भएको बोर्ड सेउती खोला वारी र पारी राखेका थिए ।

प्रहरीको उक्त बोर्डले पनि धरान र इटहरी उपमहानगरको सीमा भएको भन्ने भ्रम सिर्जना गरेको भन्दै मेयर साम्पाङले हटाउन निर्देशन दिएका थिए ।

मेयर साम्पाङले धरान र इटहरीको सीमा क्षेत्र पानीपिया नै भएकोले बोर्ड राखिएको प्रतिक्रिया दिए । उनले यसअघि आएको विवादबारे जिल्ला समन्वय समितिलाई लिखित जानकारी गराएपनि कुनै चासो नदिएको बताए ।

विगतमा पनि राखिएको बोर्ड उखेलेर लगेको र ती व्यक्तिहरुलाई कानुनी कारबाही पनि नभएको भन्दै उनले असन्तुष्टि जनाए । राखिएको बोर्ड फेरि उखेलेर लगेमा पुनः बोर्ड राख्ने उनले बताए ।

बोर्ड राखेपछि इटहरीमा रहेका राजनीतिक दल तथा अभियानकर्मीले आपत्ति जनाएका छन् । देखिएको सीमा विवाद छलफल गरेर टुङ्गोमा पुग्नुको सट्टा धरान नगर प्रमुख साम्पाङले एकतर्फी निर्णय गरेको उनीहरुको भनाइ छ ।