तरहरा : इटहरी २० तरहरास्थित होम्समा बसको ठक्करबाट मोटरसाइकल चालक गम्भीर घाइते भएका छन् ।
शनिबार राति ९ बजेतिर कोशी लोकमार्गमा पर्ने उक्त क्षेत्रमा इटहरीबाट धरानतर्फ जाँदैगरेको प्रदेश नं. १–०२–००२ ख ०६९९ नम्बरको बसले पूर्वबाट पश्चिमतर्फ बाटो क्रस गर्दै गरेको प्र ३–०२–१४ प ६७७५ नम्बरको मोटरसाइकललाई ठक्कर दिएको थियो ।
दुर्घटनामा मोटरसाइकल चालक भोजपुरको अन्नपूर्ण गाउपालिका ८ बस्ने ३२ वर्षीय खगेन्द्र चौलागाईँ गम्भीर घाइते भएका छन् । प्रहरीका अनुसार उनको टाउकोमा गम्भीर चोट लागेको छ ।
मोटरसाइकल पछाडि सवार इटहरी उपमहानगरपालिका २० बस्ने ४० वर्षीया लक्ष्मी पराजुली घाइते भएकी छन् । दुवै जनाको विराटनगरस्थित विराट नर्सिङ होम अस्पतालमा उपचार भइरहेको छ ।
बस र चालक धरान उपमहानगरपालिका १३ बस्ने ३३ वर्षीय सुमन श्रेष्ठ इलाका प्रहरी कार्यालय इटहरी सुनसरीको नियन्त्रणमा रहेका छन् ।
घटनास्थलमा इलाका प्रहरी कार्यालय इटहरीका डीएसपी लक्ष्मी भण्डारी र प्रहरी चौकी तरहराका प्रहरी नायब निरीक्षक (सई) टीकाप्रसाद नेपाल खटिएर घाइतेको उद्दार गरी अस्पताल पठाइएको थियो ।
गम्भीर घाइते भएका चौलागाईँ शिक्षक सेवा आयोगको परीक्षा दिन इटहरी आएका थिए ।
शनिवारको परीक्षा दिएर दिदी लक्ष्मीको घर आउँदै गर्दा उनी दुर्घटनामा परेका हुन् । दुर्घटनामा परेका लक्ष्मी र खगेन्द्र दिदीभाइ रहेको प्रहरी स्रोतले जनाएको छ ।
‘गम्भीर घाइते भएका खगेन्द्रको अहिले आइसियुमा राखेर उपचार जारी रहेको परिवारजनले खबर गर्नुभएको छ,‘ तरहरा प्रहरी चौकीका सई नेपालले भने, ‘उहाँ भोजपुरबाट शिक्षक सेवा आयोगको परीक्षाका लागि आउनुभएको रहेछ ।‘
{थप अपडेट : उपचारका क्रममा चौलागाईँको मृत्यु भएको प्रहरीले पुष्टि गरेको छ ।}
Discussion about this post