एसओएसमा प्रोजेक्ट एक्स्पो

इटहरी : इटहरीस्थित एसओएस हर्मन माइनर माध्यमिक विद्यालयले बृहत् शैक्षिक प्रदर्शनी प्रोजेक्ट एक्स्पो २०२५ सम्पन्न गरेको छ ।

सिकाइलाई व्यावहारिक बनाउने उद्देश्यले कक्षा नर्सरीदेखि १२ सम्म विद्यार्थीले उक्त प्रदर्शनी गरेका हुन् ।

इटहरी उपमहानगरपालिकाकी उपप्रमुख सङ्गीताकुमारी चौधरीको प्रमुख आतिथ्यमा सुरु भएको प्रदर्शनीमा एक हजार दुई सय बढीले अवलोकन गरेका थिए ।

अवलोकनकर्ताहरूमा अभिभावक, विभिन्न १० वटा विद्यालयका विद्यार्थीसहित स्थानीयहरूको उपस्थिति थियो ।

१ सय ४६ स्टलमा राखिएका प्रदर्शनीमा विद्यार्थीले नेपाली, सामाजिक, अङ्ग्रेजी, गणित, विज्ञान तथा कम्प्युटर विषयसँग सम्बन्धित विभिन्न जीवनोपयोगी कुरा समावेश गरिएको थियो ।

कार्यक्रममा विद्यार्थीले विभिन्न कम्प्युटर एप्लिकेशन बनाउनुका साथै स्तरअनुसार विभिन्न जातजातिका वेशभूषा, खानपानका साथै पर्यावरणीय सचेतनाका लागि सडक नाटकसमेत प्रदर्शनी गरेका थिए ।

विज्ञान तथा प्रविधिका अतिरिक्त जीवनोपयोगी सामग्रीको समेत प्रदर्शनी गरेका थिए । उक्त प्रदर्शनीमा उपस्थितले कार्यक्रम उपयोगी भएको प्रतिक्रिया दिएका थिए ।

कार्यक्रममा बोल्दै इटहरीकी उपप्रमुख चौधरीले विद्यार्थीले विभिन्न सिकाइमा सहभागी भएर जीवनोपयोगी सिकाइलाई व्यावहारिक बनाएकामा आफू खुसी भएको बताइन् ।

उनले भनिन्, ‘‘ससाना नानीबाबुहरूका यिनै सिर्जना भविष्यमा आविष्कार र नवप्रवर्तन हुने हुन् । विद्यालयको यस प्रयास प्रशंसनीय छ ।’’

प्रत्येक वर्ष विद्यार्थीका सिकाइलाई व्यावहारिक बनाई दक्ष जनशक्ति बनाउने उद्देश्यले कार्यक्रम आयोजना गरिएको विद्यालयका प्रधानाध्यापक शशीकुमार उपाध्यायले बताए ।

उनले भने, ‘‘हामी विद्यार्थी पाठ्यक्रमका विषयवस्तुलाई सैद्धान्तिक रूपमा पढाउने मात्र नभई त्यसको व्यावहारिक रूपान्तरणका लागि प्रयास गर्छौँ । यसकारण हामी विद्यार्थीलाई सहज वातावरणमा प्रयोगात्मक सिकाइका लागि प्रोत्साहन गर्छौँ।’’

इटहरीमा गुणस्तरीय सिकाइका लागि परिचित हर्मन माइनर विद्यालयले विद्यालयले दोस्रो त्रैमासिक परीक्षाको नतिजासमेत वितरण गरेको थियो ।

प्रविधिका विषयमा भएको तीव्र विकाससँगै यस क्षेत्रमा दक्ष जनशक्ति निर्माण गरी विद्यार्थीलाई स्वरोजगार र आत्मनिर्भर बनाउन विद्यालयले कम्प्युटर इन्जिनियरिङ कक्षा ९–१२ सञ्चालन गर्दै आएको छ ।

एसओएस बालग्राम नेपालद्वारा सञ्चालित यस विद्यालयमा ६२४ जना विद्यार्थी अध्ययनरत छन् ।