मोरङ : मोरङको धनपालथान गाउँपालिका–७ कदमास्थित भित्री सडकमा मोटरसाइकलको ठक्करबाट एक वृद्धाको मृत्यु भएको छ।
प्रहरीका अनुसार कदमाबाट नोचातर्फ जाँदै गरेको को ३३ प ८९५३ नम्बरको मोटरसाइकलले बाटो काट्दै गरेकी स्थानीय ७० वर्षीया चुम्नीदेवी मण्डललाई ठक्कर दिएको थियो।
दुर्घटनामा गम्भीर घाइते भएकी मण्डलको टाउको र अनुहारमा चोट लागेको थियो। उनलाई उपचारका लागि विराटनगरस्थित न्यूरो अस्पताल लगिएकोमा उपचारकै क्रममा बिहीबार बिहान करिब ४ बजेतिर मृत्यु भएको प्रहरीले जनाएको छ।
दुर्घटनापछि मोटरसाइकल चालक धनपालथान–१ नोचाका १७ वर्षीय धीरज मण्डललाई प्रहरीले नियन्त्रणमा लिएको छ। मोटरसाइकल इलाका प्रहरी कार्यालय गडेरियामा राखिएको छ।
प्रारम्भिक अनुसन्धानका क्रममा दुर्घटना तीव्र गतिका कारण भएको देखिएको प्रहरीले जनाएको छ।
घटनाबारे थप अनुसन्धान भइरहेको जिल्ला प्रहरी कार्यालय मोरङले जनाएको छ।
Discussion about this post