उदयपुर : सगरमाथा राजमार्गअन्तर्गत उदयपुरको त्रियुगा नगरपालिका–१० मा मोटरसाइकलको ठक्करबाट साइकलयात्रीको मृत्यु भएको छ। दुर्घटनामा मोटरसाइकल चालक घाइते भएका छन्।
प्रहरीका अनुसार आइतबार दिउँसो गाईघाटबाट करमगाछीतर्फ जाँदै गरेको प्रदेश ३–०२–०१४ प ०७७५ नम्बरको मोटरसाइकलले बाटो काट्ने क्रममा साइकललाई ठक्कर दिएको थियो।
दुर्घटनामा गम्भीर घाइते भएका त्रियुगा–१० का करिब ६० वर्षीय सन्तबहादुर राईलाई उपचारका लागि जिल्ला अस्पताल उदयपुर लगिएको थियो।
अस्पताल पुर्याएलगत्तै चिकित्सकले उनलाई मृत घोषणा गरेका थिए।
दुर्घटनामा मोटरसाइकल चालक सिराहाको नरहा गाउँपालिका–३ घर भई हाल त्रियुगा नगरपालिका–१२ बस्ने १९ वर्षीय मोहम्मद सविर राईन पनि घाइते भएका छन्।
शरीरका विभिन्न भागमा चोट लागेका राईनको जिल्ला अस्पतालमा सामान्य उपचारपछि थप उपचारका लागि न्युरो अस्पताल विराटनगरमा रेफर गरिएको जिल्ला प्रहरी कार्यालय उदयपुरका सूचना अधिकारी प्रहरी नायब उपरीक्षक गणेश बमले जानकारी दिए।
सडकमा बाटो काट्ने क्रममा भएको दुर्घटनापछि प्रहरीले दुर्घटनाको कारण, सवारीको अवस्था र चालकको भूमिकाबारे अनुसन्धान अघि बढाएको जनाएको छ।
Discussion about this post