इटहरी : इटहरीमा ६ जना पुरुषहरुले एक महिलामाथि जबरजस्ती करणी गरेका छन् । ६ जनामध्ये पाँचजना १८ वर्षभन्दा कम उमेरका रहेको इटहरी प्रहरीले जनाएको छ ।
इलाका प्रहरी कार्यालय इटहरीका प्रहरी नायब उपरीक्षक (डीएसपी) अर्जुन केसीका अनुसार घटना असोज १५ गते शुक्रबार साँझ ७ बजेको हो ।
‘इटहरी ८ भूर्की भन्ने ठाउँमा इभिनिङ वाकमा हिँडिरहेकी ३० वर्षीया महिलामाथि जबरजस्ती करणीसँगै लुटपाट भएको थियो,’ डीएसपी केसीले टाकुरासँग फोन सम्पर्कमा भने, ‘पीडितको उजुरीका आधारमा हामीले पाँचजनालाई पक्राउ गरेका छौँ, एकजनाको खोजी कार्य भइरहेको छ ।’
उनका अनुसार ६ जनामध्ये पाँचजनालाई पक्राउ गरिएको छ भने एकजनाको खोजी कार्य भइरहेको छ । पक्राउ परेकामध्ये एकजनाको मात्रै प्रहरीले नाम सार्वजनिक गरेको छ, भने अन्य चारजनाको नाम गोप्य राखेको छ । पक्राउ पर्नेमा अन्दाजी २७ वर्षीय सुनिल चौधरी रहेका छन् । चौधरी इटहरी १४ घर भएको प्रहरीको प्रारम्भिक अनुसन्धानबाट खुलेको छ ।
‘अन्य सबै नाबालक रहेका कारण नाम, थर सार्वजनिक गरिएको छैन,’ डीएसपी केसीले टाकुरालाई भने, ‘जबरजस्ती गर्ने क्रममा नगद तथा गरगहना समेत लुटपाट भएको थियो, हामीले नियन्त्रणमा लिएर आवश्यक अनुसन्धान अगाडि बढाएका छौँ ।’
प्रहरीका अनुसार पीडित महिलालाई पुरुषहरूले सडक छेउको धान खेतमा लगेर जबरजस्ती करणी गरी घाँटीमा लगाएको सुनको सिक्री (दुई तोला, चार आना) तथा साथमा रहेको नगद तीन हजार समेत लुटपाट गरेका थिए ।
पक्राउ परेकाहरूविरुद्द सुनसरी जिल्ला अदालतबाट मुलुकी अपराध संहिता २०७४ अन्तर्गत जवर्जस्ती करणी सम्वन्धी कसुरमा पाँचदिनको म्याद थप गरी आवश्यक अनुसन्धान भइरहेको प्रहरीले जनाएको छ ।
Discussion about this post