मोरङ : मोरङको रमितेमा एक जनाको बीभत्स हत्या गरेर शवलाई जंगलमा गाडिएको घटनामा संलग्न प्रतिवादीहरू १६ वर्षपछि पक्राउ परेका छन् ।
घटना भएको १६ वर्षपछि तीनजना प्रतिवादीलाई पक्राउ गरिएको मोरङ प्रहरीले जनाएको छ ।
मोरङ प्रहरीका प्रवक्ता डीएसपी रन्जनकुमार दाहालका अनुसार पक्राउ पर्नेमा मोरङको मिक्लाजुङ गाउँपालिका १ रमितेका ४८ वर्षीय जीतबहादुर राई, ४१ वर्षीय गंगा भनिने ज्ञानबहादुर राई र ४० वर्षीय लक्ष्मण राई रहेका छन् ।
साविकको रमिते गाविस ४ का ३८ वर्षीय सन्तोष राईको १६ वर्षअघि बीभत्स हत्या गरेर शव जंगलमा गाडिएको थियो ।
स्थानीय हर्कराज राईको घरपैँचोमा जम्मा भएका स्थानीयबीच विवाद हुँदा उनको हत्या भएको हो । लाट्ठी, भाटालगायतले प्रहार गरेर सन्तोषको हत्या गरी केमुना भञ्ज्याङको जंगलमा खाल्डो खनेर गाडेको अवस्थामा प्रहरीले शव उत्खनन गरेको थियो ।
प्रहरीले घटनामा संलग्न रहेको भनेर ११ जनालाई प्रतिवादी बनाएको थियो । उनीहरूविरुद्ध त्यतिबेला मोरङ अदालतमा कर्तव्य ज्यान मुद्दा दर्ता गरेसँगै अदालतले २०७७ साल फागुन १८ गते मुद्दाको फैसला गरेको हो ।
अदालतले ११ जना प्रतिवादीमध्ये ५ जनालाई जन्मकैद, ३ जनालाई जनही ५ वर्ष कैद र ३ जनालाई सफाइ दिने फैसला गरेको थियो ।
जन्मकैदको फैसला सुनाइएकामध्ये ३ जनालाई हाल पक्राउ गरेको हो ।
अदालतले यसअघि नै जन्मकैदको फैसला सुनाइसकेका उनीहरूलाई इलाका प्रहरी कार्यालय उर्लाबारीका इन्सपेक्टर देवेन्द्र दासको नेतृत्वमा खटिएको टोलीले पक्राउ गरेको हो ।
गाउँघरमै लुकिछिपी बसिरहेका जीतबहादुर र ज्ञानबहादुर सोमबार राति पक्राउ परेका हुन् । लक्ष्मणलाई झापाको काँकडभिट्टाबाट मंगलबार बिहान पक्राउ गरिएको डीएसपी दाहालले बताए ।
अदालतका सूचना अधिकारी ओमराज सुवेदीका अनुसार प्रहरीले पेस गरेपछि तीनै जना प्रतिवादीलाई सजाय भुक्तानका लागि कारागार चलान गरिएको छ ।
Discussion about this post