इटहरी : इटहरीमा स्कुल थियटरको नवौं संस्करणको तयारी पूरा भएको छ । आइतबार र सोमबार (बैशाख ९ र १०)मा इटहरीस्थित तायारिप्ची भवनमा स्कुल थियटरका प्रशिक्षार्थीहरूले आफ्नो प्रस्तुति दिनेछन् ।
५ वर्षदेखि १६ वर्ष उमेर समूहका उनीहरूले १५ दिने कार्यशाला पूरा गरेसँगै अब आइतबार र सोमबार नाटक प्रस्तुत गरिने कलालय इटहरीले जनाएको छ ।
६१ जना प्रशिक्षार्थीहरूले ६ वटा छोटा नाटक प्रस्तुत गर्नेछन् । ‘नाटकको कथा निर्माणदेखि निर्देशनसम्म प्रशिक्षार्थी विद्यार्थीहरूकै रहेको छ,’ कलालय इटहरीका अध्यक्ष सोनु जयन्तीले भने, ‘आफूलाई म सक्छु भन्ने अनुभूति होस् भन्ने उदेश्यले सानै उमेरमै हामी सक्छौँ भन्ने भाष्य निर्माण गर्नका लागि पनि यो अभ्यास गरिएको हो ।’
‘हामी सक्दैनौँ, अरुले गरेको काममै निर्मित हुनुपर्छ’ भन्ने भाष्यलाई चिर्नका लागि पनि नव कलाकारहरूलाई नाटक क्षेत्रमा स्थापित गर्न उनीहरूले नै कथा लेखन र नाटकको निर्देशन गरेको जयन्तीले बताए ।
नाटकमा पर्यावरण, प्रविधिको विकास र यसको प्रयोकर्ताका कुरा, शिक्षाबारेलगायतका कथा चित्रण गरिएकको छ । कलालय इटहरीले १४ वर्षयता स्कुल थियटर सञ्चालन गरिरहेको छ ।
‘हामीले यसअघि इटहरीमा प्रदर्शन गरिरहेको मूलधारका नाटकमा सहभागी सबै कलाकारहरू स्कुल थियटरबाटै स्थापित भएका हुन्,’ जयन्ती भन्छन्, ‘हाम्रो उदेश्य कलाकार उत्पादन र तिनीहरूलाई यस क्षेत्रमै स्थापित गराउनसँगै जीवन बुझ्न सहज भन्ने हो ।’
उनले ‘थियटरले नाटक गर् भनेर नभन्ने र आफूलाई खोज्’ भन्ने उदेश्य राख्ने सुनाए । उनले थपे, ‘सबैजना नाटकमै स्थापित हुनुपर्छ भन्ने होइन, आफू जुनसुकै क्षेत्रमा भएपनि त्यहाँ नाटकले उसको जीवनलाई सहज होस् भन्ने हो । नाटकलले आफूलाई मात्रै होइन, समाज चिन्न सिकाउँछ । र, मानवीय स्वभाव बुझ्न सिकाउँछ ।’
नवौं संस्करणको स्कुल थियटरमा नर्सरीदेखि कक्षा १० सम्मका २३ वटा विद्यालयका विद्यार्थीहरू सहभागी छन् ।
आइतबार र सोमबार प्रदर्शन हुने नाटक बिहान ११ बजे, दिउँसो १ बजे र साँझ ५ बजे प्रदर्शन हुनेछन् । दुई दिनमा छ वटा शो प्रदर्शनको तयारी रहेको कलालयले जनाएको छ ।
इटहरीमा बर्सेनि स्कुल थियटरसँगै मूलधारका नाटक पनि प्रदर्शन हुँदै आएका छन् । यसअघि कलालयकै आयोजनामा दुईपटक अन्तरदेशीय साझा रङ्गमञ्चसमेत आयोजना भइकसेको छ ।
केही वर्षअघिदेखि भारतका विभिन्न सहरमासमेत सहकार्य गर्दै नाटक प्रदर्शन गर्दै आएको कलालयले जनाएको छ ।
Discussion about this post