इटहरी : कोशी प्रदेशमा मुख्यमन्त्री हिक्मतकुमार कार्की नेतृत्वको सरकार राजनीतिक संकटको संघारमा पुगेको छ।
नेपाली कांग्रेसले एमालेसँगको सत्ता सहकार्य अन्त्य गर्ने निष्कर्ष निकालेसँगै सरकारको भविष्य अनिश्चित बनेको हो। यद्यपि, कांग्रेसले तत्काल सरकारबाट बाहिरिने निर्णय नगरी केन्द्रको निर्देशन पर्खने रणनीति अपनाएको छ।
बिहीबार बसेको कांग्रेस प्रदेशस्तरीय संयन्त्रको बैठकले सरकारबाट मन्त्री फिर्ता बोलाउने तयारी गरे पनि अन्तिम निर्णय गरेन।
बैठकले प्रदेश सभापति तथा संसदीय दलका नेता उद्धव थापा र केन्द्रीय सदस्य अमृत अर्याललाई केन्द्रीय नेतृत्वसँग समन्वय गरी आवश्यक निर्णय गर्ने जिम्मेवारी दिएको छ।
कांग्रेस संसदीय दलका नेता थापाले एमालेसँगको सत्ता सहकार्य राजनीतिक रूपमा समाप्त भइसकेको स्पष्ट पारे। उनका अनुसार अब कांग्रेस एमालेसँग पुनः सहकार्य, नेकपासँग नयाँ गठबन्धन वा प्रतिपक्षमा बस्ने तीन विकल्पमाथि छलफल गरिरहेको छ।
कांग्रेस सरकारबाट बाहिरिने भएसँगै कार्की नेतृत्वको सरकार अल्पमतमा पर्ने सम्भावना बलियो बनेको छ। त्यसपछि नयाँ सरकार गठन वा विश्वासको मत लिनुपर्ने अवस्था आउन सक्ने भएकाले प्रदेशको राजनीति फेरि तरंगित बनेको छ।
९३ सदस्यीय प्रदेशसभामा सरकार गठनका लागि ४७ सांसद आवश्यक पर्छ। एमालेसँग ४० सांसद मात्रै रहेकाले कांग्रेसको समर्थन गुमेपछि सरकार टिकाउन अर्को दलको साथ अनिवार्य हुनेछ। यही कारण अहिले सत्ता समीकरणको केन्द्रमा नेकपा (माओवादी केन्द्र) देखिएको छ।
स्रोतका अनुसार एमाले र कांग्रेस दुवैले माओवादी केन्द्रलाई आफ्नो पक्षमा ल्याउन आन्तरिक संवाद तीव्र बनाएका छन्। नेकपाले लिने निर्णयले नै कोशी प्रदेशको आगामी सरकारको स्वरूप तय गर्ने अवस्था सिर्जना भएको छ।
यता कांग्रेसभित्र पनि नयाँ समीकरण बने आफ्नै नेतृत्वमा सरकार गठन गर्ने गृहकार्य सुरु भएको छ। संसदीय दलका नेता थापालाई मुख्यमन्त्रीको उम्मेदवार बनाउने विषयमा आन्तरिक छलफल भइरहेको भए पनि त्यसबारे औपचारिक निर्णय भने भएको छैन।
हाल कार्की नेतृत्वको सरकारमा कांग्रेसका तर्फबाट पाँच मन्त्री सहभागी छन्।
सरकारमा कांग्रेसका तर्फबाट पूर्वाधार मन्त्री प्रदीपकुमार सुनुवार, स्वास्थ्यमन्त्री मानबहादुर लिम्बू, पर्यटन वन तथा वातावरण मन्त्री भीम पराजुली, उद्योग, कृषि तथा सहकारी मन्त्री इस्राइल मन्सुरी र भौतिक राज्यमन्त्री शोभा चेम्जोङ सहभागी छन्।
उनीहरूलाई फिर्ता बोलाउने तयारी रहे पनि केन्द्रको संकेत नआएकाले निर्णय स्थगित गरिएको कांग्रेसका प्रमुख सचेतक गोपाल तामाङले बताए।
कोशीको सत्ता निरन्तरताबारे अब केन्द्रबाट आउने राजनीतिक निर्णय नै निर्णायक हुने देखिएको उनी बताउँछन्।
उनका अनुसार केन्द्रबाट औपचारिक निर्णय आएपछि प्रदेशमा पुनः बैठक बसेर सरकारमा रहने वा बाहिरिने विषयमा अन्तिम निर्णय गर्नका लागि थापालाई जिम्मेवारी दिइएको छ।
‘बिहीबारको बैठकबाट ठ्याक्कै यसै गर्ने भन्ने निर्णय नहुँदा मन्त्रीलाई पनि फिर्ता नबोलाइएको हो,’ तामाङले भने, ‘अब राजनीतिक अवस्था हेरेर केन्द्रको निर्णयबाट समीकरण टुंगिन्छ।’
सुदूरपश्चिदेखि देखिएको प्रदेशहरूको सत्ता समीकरणमा कोशीको समस्या भने फरक रहेको उनको तर्क छ। कोशीमा चार वर्षयता पटक–पटक सरकार परिवर्तन हुँदै आएको छ।
यो पनि – कोशी सरकारबाट बाहिरिने तयारीमा कांग्रेस, मन्त्रीहरूले आजै राजीनामा दिने सम्भावना
Discussion about this post