इटहरी। सुनसरीको देवानगञ्ज गाउँपालिका–१ कप्तानगञ्जमा शनिबार साँझ गोली चलेको छ। गोली लागेर स्थानीय १९ वर्षीय निरज यादव घाइते भएका छन्।
लक्ष्मीनारायण मन्दिर अगाडि भएको घटनामा यादवको तिघ्रामा गोली लागेको प्रहरीले जनाएको छ। घाइते यादवको विराटनगरस्थित नोबेल अस्पतालमा उपचार भइरहेको छ।
घटनापछि प्रहरीले दुई जनालाई नियन्त्रणमा लिएको छ। स्थानीय प्रत्यक्षदर्शीका अनुसार घटनामा संलग्न अन्य केही व्यक्ति फरार रहेको बताइएको छ।
जिल्ला प्रहरी कार्यालय सुनसरीका प्रहरी नायब उपरीक्षक तथा प्रवक्ता चन्द्रबहादुर खड्काले गोली चलेको पुष्टि गर्दै घटनाबारे विस्तृत अनुसन्धान भइरहेको जानकारी दिएका छन्। गोली कसले र किन चलाएको भन्ने विषयमा प्रहरीले अनुसन्धान गरिरहेको छ।
यसअघि गत साउन १० गते पनि देवानगञ्ज–३ कप्तानगञ्जमा दुई पक्षबीच भएको झडपका क्रममा तीन जनाको मृत्यु भएको थियो। उक्त घटनापछि केही समय शान्त रहेको क्षेत्रमा पुनः गोली चलेपछि स्थानीयमा त्रास बढेको छ।
Discussion about this post