इटहरी : नेपाली काँग्रेसको १५औँ महाधिवेशनमा सुनसरीका दुई हस्ती उम्मेदवार बनेका छन् । नेपाली काँग्रेस सुनसरीका दुई महत्त्वपूर्ण नेताका रुपमा उदाएका राजीव कोइराला र राजीव ढुङ्गानाले उम्मेदवारी दिएका छन् ।
यसअघि सुनसरी जिल्ला सभापतिसमेत रहेका राजीव कोइरालाले केन्द्रीय सदस्यमा उम्मेदवारी दिएका छन् । यसअघि पनि केन्द्रीय सदस्यमा मनोनीत कोइराला २०७४ सालको निर्वाचनमा सुनसरी क्षेत्र नम्बर २ ख बाट निर्वाचित प्रदेश सांसद बनेका थिए ।
२०७९ सालमा भने निर्वाचनमा हार बेहोरेका उनी गत फागुनमा भएको प्रतिनिधिसभाको निर्वाचनमा सुनसरी क्षेत्र नं. २ का नेपाली काँग्रेसका उम्मेदवारसमेत थिए । रास्वपाका लालविक्रम थापासँग चुनावी प्रतिस्पर्धामा उत्रिएका कोइरालाले निर्वाचन हारेका थिए । दुई कार्यकाल सुनसरी जिल्ला सभापतिका रुपमा रहेका कोइराला सुनसरीका लोकप्रिय नेताका रुपपमा चिनिन्छन् ।
सुनसरीलगायत कोशी प्रदेशमा वैचारिक, निष्ठावान् एवम् अध्ययनशील नेताका रुपमा कोइरालालाई लिइन्छ । दुईपटक प्रतिनिधिसभाको निर्वाचनमा पराजय भोगेका कोइराला एकपटक सुनसरी क्षेत्र नं. २ ख का प्रदेश सांसद बनिसकेका छन् । सुनसरी जिल्लामा कोइराला विवादरहित स्वच्छ छविका नेताका रुपमा लिइन्छ ।
त्यस्तै, नेपाल विद्यार्थी संघको राजनीतिबाट उदाएका राजीव ढुंगानाले काँग्रेस महाधिवेशनमा सहमहामन्त्री पदमा उम्मेदवारी दिएका छन् ।
२०४६ सालको जनआन्दोलनबाट विद्यार्थी राजनीतिमा लागेका ढुंगाना २०५० सालमा नेपाल विद्यार्थी संघ सुनसरी जिल्ला सचिव बनेका थिए । हाल नेपाली काँग्रेसका वरिष्ठ उपसभापति रहेका विश्वप्रकाश शर्मा अध्यक्ष रहेका बेला २०५७ सालमा ढुंगाना नेपाल विद्यार्थी संघको केन्द्रीय सदस्य बनेका थिए । नेपाल विद्यार्थी संघकै केन्द्रीय कोषाध्यक्ष, उपाध्यक्ष हुुँदै २०७६ सालमा अध्यक्षसमेत बनेका थिए ।
सुनसरीका वैचारिक नेताका रुपमा लिइने ढुंगानाको नेपाली काँग्रेसको पदाधिकारीमा पहिलोपटक उम्मेदवारी हो । यसअघि उनी महासमिति सदस्य रहे । १४ औँ महाधिवेशनमा खुलातर्फको केन्द्रीय सदस्यमा निर्वाचित भएका थिए ।
पार्टीको संगठनात्मक विकासमा ढुंगानाको महत्त्वपूर्ण भूमिका रहेको छ । प्रतिनिधिसभाको उम्मेदवार बन्ने रहर पालेका ढुंगानाले सहमहामन्त्री पदमा जित निकाल्ने आँकलन गरिएको छ । खुलातर्फ दुई सिट सहमहामन्त्री पदमा १० जनाको उम्मेदवारी परेको छ ।
सुनसरीबाट को को छन् उम्मेदवार ?
सुनसरी जिल्लाबाट नेपाली काँग्रेसको पन्ध्रौँ महाधिवेशनमा उम्मेदवारी दिनेमा मेदिनीप्रसाद सिटौला छन् । नेपाली काँग्रेस सुनसरीका पाका नेता सिटौला कोशी प्रदेश फाँटको खुलामा केन्द्रीय सदस्यका उम्मेदवार हुन् ।
३५ वर्षमुनिका युवा फाँटबाट केन्द्रीय सदस्य पदका उम्मेदवारका रुपमा दोर्ची शेर्पाले उम्मेदवारी दिएका छन् । उनी नेपाल विद्यार्थी संघ सुनसरीका नेता हुन् । महेन्द्र बहुमुखी क्याम्पस धरानमा २०७४ सालको स्ववियू सचिवसमेत हुन् ।
त्यस्तै सुनसरीबाट आदिवासी जनजाति कोटाबाट सूर्यदेव दास उराव केन्द्रीय सदस्यका उम्मेदवार हुन् । उनी प्रतिनिधिसभाको निर्वाचन २०७१ मा सुनसरीबाट समानुपातिक सांसद बनेका थिए ।
सुनसरीबाट दिलकुमारी राईको पनि आदिवासी महिला कोटामा केन्द्रीय सदस्यको उम्मेदवारी परेको छ ।
Discussion about this post