झापा : झापामा एक प्रिन्सिपलले सहकर्मी शिक्षिकामाथि यौन दुर्व्यवहार गरेको खुलासा भएको छ ।
झापाको मेचीनगर नगरपालिका ७ स्थित अरनिको माध्यमिक विद्यालयका प्रिन्सिपल अग्नि घिमिरेले यौन दुर्व्यवहार गरेको खुलासा भएपछि राजीनामा दिएका छन् ।
सहकर्मी एकल महिला शिक्षिकामाथि यौन दुर्व्यवहार गरेको घटना सार्वजनिक हुने र कानूनी सजाय भोग्नुपर्ने डरले घिमिरेले पद र पेसाबाटै बुधबार राजीनामा दिएका हुन् ।
विद्यालयकी महिला शिक्षिकका अनुसार घिमिरेले लामो समयदेखि यौन हिंसा गर्ने गरेको खुलाएपछि घिमिरेले राजीनामा दिएको खुलेको छ ।
घिमिरेले आफ्नो कर्तुत ढाकछोप गर्न पीडित महिला जागिरबाट निकालिदिने, सार्वजनिक रूपमा बेइज्जत गर्ने जस्ता धम्की दिँदै आएको समेत खुलेको छ ।
घिमिरेले मोबाइलमार्फत पटकपटक यौनजन्य म्यासेज पठाएको, पढाइरहेको बेला अनावश्यक कुरा लिएर कक्षा कोठामा नै पुगेर असहज व्यवहार गर्ने गरेको, विद्यालयबाट शिक्षक भ्रमण जाँदा समेत यौनहिंसा गरेको ती महिला शिक्षकले सहकर्मीहरुलाई सुनाएपछि घटना सार्वजनिक भएको हो ।
घटनाका बारेमा विद्यालय परिवार र व्यवस्थापन समितिलाई समेत जानकारी भएपछि घटना सार्वजनिक नगर्न विद्यालय प्रशासनले धम्की दिँदै आएको पीडित महिलाले जनाएकी छन् ।
Discussion about this post