नामकरणको विषयमा ज्यान जोखिममा परेको भन्दै सांसद सर्वध्वज साँवाको ‘गुहार’ (भिडियो)

इटहरी : नामकरणको विषयमा ज्यान जोखिममा परेको भन्दै प्रदेश १ का सांसद सर्वध्वज साँवाले ‘गुहार’ मागेका छन् ।

आइतबार प्रदेशसभाको शून्य समयावधिमा बोल्दै साँवाले नामकरणको विषयमा आफूहरू घेराबन्दीमा परेको बताए ।

उनले भने, ‘गुहार, गुहार, गुहार भन्न चाहन्छु, किनकि अहिले हामी माननीयहरूलाई बलीका बोका बनाइएको छ, कहिले मुख्यमन्त्री घेरामा पर्नुहुन्छ, कहिले हामी सांसदहरू घरमै घेरामा पर्छौँ ।’

उनले प्रदेशको नामकरणलाई लिएर सडकमा आन्दोलन भइरहेकाले यो खतराको संकेत रहेकाले यसबाट बचाउनुपर्ने निवेदन गरे ।

‘प्रदेशको नाम कोही समूहले भन्नुहुन्छ, कोशी राख्नुहोस्, नत्र यो चुनावमा पहिचानवादी शून्य बनाइदिन्छौँ भन्दै धम्की आउँछ,’ साँवाले भने, ‘अर्को समूह भन्छ किरात लिम्बूवान नाम राखेनौ भने कोशीमा बगाइदिन्छौँ भन्ने घेरामा परिरहेका छौँ, हामी बढो सकसमा छौँ ।’

नामकरण नहुँदा ज्यानै जोखिममा परेको भन्दै उनले भने, ‘हामी अफ्ट्यारो परिस्थितिमा छौँ, ज्यान जोखिममा परेको छ, त्यसो भएको हुनाले यो अफ्ट्यारोबाट बचाउनका निम्ति प्रदेशसभामा गोप्य मतदान गर्ने व्यवस्था गरियोस्, वा जनमतसङ्ग्रह गर्ने व्यवस्था गरियोस् ।’

कसले कहाँ मत हालेको जनताले हेर्ने भएकाले त्यसतर्फ ध्यान दिन उनले आग्रह गरे ।

९३ सांसद रहेको प्रदेश १ मा ९० मध्ये नामकरणका लागि ६१ सांसदको मत आवश्यक पर्छ । एमालेका ३९, कांग्रेसका २१, माओवादी केन्द्रका १५, एकीकृत समाजवादीका १०, जसपाका तीन, राप्रपा र संघीय लोकतान्त्रिक राष्ट्रिय मञ्चका एक–एक सांसद छन् ।

नेपालको संविधानअनुसार प्रदेशको नामकरणका लागि दुई तिहाइ बहुमत आवश्यक पर्छ ।

प्रदेश १ को नामकरणका लागि सगरमाथा, कोशी, सप्तकोशी, किरात, कोशी किरात, किरात लिम्बूवान, लिम्बूवान नाम चर्चामा छन् ।

भिडियो