इटहरी : इटहरी उपमहानगरपालिका १० घर भएका दुईजनालाई प्रहरीले सुनका गहनासहित विराटनगरबाट पक्राउ गरेको छ ।
वडा प्रहरी कार्यालय विराटनगरका प्रमुख डीएसपी विजय श्रेष्ठको नेतृत्वमा खटिएको टोलीले विराटनगर महानगरपालिका ९ ठाकुरबारी रोडबाट ४५ वर्षीय इन्द्र विक र ४० वर्षीय गोविन्द विकलाई प्रहरीले पक्राउ गरेको हो ।
मोरङ प्रहरीका प्रवक्ता डीएसपी रन्जनकुमार दाहालले बागमती प्रदेश १–०२८ च २८४६ नम्बरको कारमा सवार रहेका उनीहरुलाई सोमबार राति ९ बजेतिर पक्राउ गरिएको जानकारी दिए ।
ठाकुरबारी रोडको आरके जेम्स ज्वेलर्समा गहना बेच्न खोज्दै गर्दा उनीहरु पक्राउ परेका हुन् ।
शंका लागेपछि प्रहरीले उनीहरु सवार कार नियन्त्रणमा लिएर चेकजाँच गरेको थियो । डीएसपी दाहालका अनुसार पक्राउ परेकाको साथबाट पोतेमा प्रयोग गरिने विभिन्न डिजाइनका २ सय ३९ थान सुनका गहना बरामद गरिएको छ ।
बरामद भएको ९ तोला ४३ लाल सुनको बजार मूल्य ११ लाख बढी रहेको उनले बताए । पक्राउ परेका उनीहरूमाथि थप अनुसन्धान भइरहेको प्रहरीले जनाएको छ ।
Discussion about this post