इटहरी : नेपाली कांग्रेसका महामन्त्री गगन थापाले धरान आएर भिजिट भिसा प्रकरणबारे बोलेका छन् ।
कांग्रेस धरान उपमहानगरपालिकाको आयोजनामा भएको सम्मेलनलाई सम्बोधन गर्ने क्रममा महामन्त्री थापाले भिजिट भिसा प्रकरणबारे बोलेका हुन् ।
‘भ्रष्टाचारको विषयले गर्दा, काण्डै–काण्डले गर्दा नागरिकहरुमा यति धेरै फ्रस्टेसन भएको छ कि देश सबै काण्डै–काण्डमा डुब्यो भन्ने लागेको छ,’ थापाले सम्बोधनका क्रममा भने, ‘यी कुराहरू आइरहँदा नेपाली कांग्रेस पार्टी कसरी बुझ्ने ? यसबारे चिन्तन गर्ने यो बारे छलफल गर्नुपर्ने भएको छ ।’
कांग्रेसबाटै गृहमन्त्री बनेका रमेश लेखकको विषयमा उनले आफ्ना धारणा सार्वजनिक गरे ।
‘यसभन्दा अगाडि नक्कली भुटानी शरणार्थीको प्रकरण आयो । अहिले भिजिट भिसा प्रकरण आएको छ । हामीले पार्टीको तर्फबाट हिजो पनि भन्यौँ कि, कुनै पनि सार्वजनिक पदमा बसेको मानिसले कुनै पनि गलत काम गर्छ, अख्तियारको दुरुपयोग गर्छ, देश र जनताको अहित हुने काम गर्छ, आफ्नो निजी सम्पत्ति बढाउने काम गर्छ अख्तियारको दुरुपयोग गरेर भने दण्डनीय हुनुपर्छ,’ महामन्त्री थापाले भने, ‘दण्ड पाउँदै गर्दा यो, त्यो, तेरो, मेरो, दायाँ, बायाँ हुनुहुन्न । निर्दोष कोही पर्नुहुन्न, दोषी कोही फस्नुहुन्न । कांग्रेसको हिजो, आज र भोलिको धारणा यही हो ।’
राज्यको जिम्मेवारी लिने निकायले नै अख्तियारको दुरुपयोग गर्नु अशोभनीय र अकल्पनीय रहेको उनले बताए ।
‘कांग्रेस, एमाले, माओवादी चाहे नयाँ पार्टी वा पुरानो पार्टीको पर्छ । मेरो घरको सहोदर भएपनि गलत गरेको छ भने त्यो अपराध हो, त्यसले सजाय पाउनुपर्छ । यो प्रकरणको सन्दर्भमा नेपालको एउटा नागरिक नेपाल छाडेर बाहिर जाँदै गर्दा अन्तरािष्ट्रय विमानस्थलमा ठगीमा पर्ने कुरा फाट्टफुट्ट सुनेका छौँ । राज्यको जिम्मेवारीमा रहेको अधिकारीहरूबाट अख्तियारको दुरुपयोग गरेर भिजिट भिसाको नाममा जुन खालको सार्वजनिक भएको छ, यो सुन्दै गर्दा हामी स्तब्ध भएका छौँ,’ उनले भने ।
खासगरी नागरिकको संरक्षण र सुरक्षा गर्नुपर्ने राज्यको निकायबाटै आम मानिस पीडित भएको कुराले पार्टी स्तब्ध भएको थापा बताउँछन् ।
यसबारे अख्तियार दुरुपयोग अनुसन्धानले छानविन थालेको र अनुसन्धान नटुंगिएसम्म कसैलाई दोषी भन्न नमिल्ने उनी बताउँछन् ।
‘यस्तो कुकृत्य गर्ने एकजनाले पनि छुट पाउनुहुन्न । जहिलेदेखि सुरु भएको छ, सबै दोषीले सजाय पाउनुपर्छ । संवैधानिक निकाय (अख्तियार)ले शक्तिको भक्ति नगरी निर्भीक भएर, भीडले के भन्छ भनेर भीडले गरेको निर्णय सुनाउने होइन । कहिलेदेखि सुरु भएको जरा, हाँगा, बिँगा पत्ता लगाएर एक–एक फाइल पल्टाएर एउटा–एउटा दोषीले सजाय पाउनुपर्छ,’ थापाले भने, ‘यसमा हाम्रा मान्छे कोही पर्छ भनेर सडकमा रुवाबासी गर्दैनौँ, गर्नु पनि हुँदैन । गलत गरेको छ भने सजाय पाउनुपर्छ ।’
राज्यको कुनै पनि निकायबाट अख्तियारको दुरुपयोग भएमा त्यो अनुसन्धान गर्न नै अख्तियार दुरुपयोग अनुसन्धान बनाएको उनले उल्लेख गरे । थापाले भने, ‘अहिले पनि सयौँ माथि अनुसन्धान भइरहेको छ, जुनसुकै विषयमा जो सुकै दोषी पाइए कारबाही हुन्छ ।’
गृहमन्त्री लेखकप्रति इङ्गित गर्दै उनले अनुसन्धानको दायरामा जो सुकै मन्त्री आएपनि जिम्मेवारीबाट अलग रहनुपर्नेमा पार्टी दृढ रहेको बताए । अहिले बाहिरिएको भिजिट भिसाको प्रकरण अमानवीय, अक्षम, अपराध रहेको थापाले बताए ।
Discussion about this post