इटहरी : नेपाली फोटोग्राफर निशान शर्माले अन्तर्राष्ट्रिय फोटोग्राफी प्रतियोगिता ‘विकी लभ्स अर्थ’ मा विश्वव्यापी दशौँ स्थान हासिल गर्न सफल भएका छन्।
५७ देशका पाँच हजार दुई सय भन्दा बढी फोटोग्राफरबाट प्राप्त ८० हजारभन्दा बढी तस्बिरबीच प्रतिस्पर्धा गर्दै शर्माको तस्बिर उत्कृष्ट दशभित्र पर्न सफल भएको हो।
प्रतियोगिताको अन्तर्राष्ट्रिय चरणमा ५७ देशबाट छनोट भई आएका ६१८ तस्बिरबीच मूल्याङ्कन गरिएको थियो।
ती ६१८ तस्बिरमध्ये शर्माको फोटोले दशौँ स्थान प्राप्त गरेको आयोजकले जनाएको छ। उनले नेपालबाट प्रतिनिधित्व गर्दै अन्तर्राष्ट्रिय स्तरमा आफ्नो प्रतिभा प्रस्तुत गरेका हुन्।
विकी लभ्स अर्थ विश्वभरका विकिमिडिया समुदायहरूले आयोजना गर्ने वार्षिक अन्तर्राष्ट्रिय फोटोग्राफी प्रतियोगिता हो।
यस प्रतियोगिताको मुख्य उद्देश्य वन, वन्यजन्तु, नदी, पहाड, संरक्षित क्षेत्र तथा अन्य प्राकृतिक सम्पदाको तस्बिरमार्फत दस्तावेजीकरण गर्नु हो।
प्रतियोगिता हरेक वर्ष राष्ट्रिय चरणबाट सुरु भई राष्ट्रिय निर्णायक समितिबाट छनोट भएका तस्बिरहरू अन्तर्राष्ट्रिय प्रतिस्पर्धामा पठाइन्छन्।
शर्माको यो तस्बिर ललितपुरस्थित गोदावरी बोटानिकल गार्डेन मा खिचिएको हो। उक्त तस्बिर खिच्ने क्रममा नेशनल जियोग्राफिक एक्सप्लोरर तथा हर्पेटोफौना अफिसर रोहित गिरीको विशेष सहयोग रहेको शर्माले बताएका छन्।
इटहरी २० तरहरा निवासी शर्माको सफलताले नेपाली फोटोग्राफीलाई अन्तर्राष्ट्रिय मञ्चमा थप चिनाउने काम गरेको जनाइएको छ।
उनको मेहनत, धैर्य र निरन्तर प्रयासले आफू मात्र होइन, देशकै नाम विश्वभर उजागर गर्न सफल भएको भन्दै शुभेच्छुकहरूले गर्व व्यक्त गरेका छन्।
यो पनि – तरहरामा मन्डारिन हाँसको दृश्य रेकर्ड, नेपालमै दुर्लभ
Discussion about this post