इटहरी : कोशी प्रदेशका मुख्यमन्त्री हिक्मत कुमार कार्कीले प्रदेश सरकारले स्थापनाको आठ वर्षमा उल्लेख्य प्रगति हासिल गरेको दाबी गरेका छन्।
प्रदेश सरकार स्थापना दिवसका अवसरमा जारी शुभकामना सन्देशमा उनले प्रदेश सरकारले छोटो अवधिमै महत्वपूर्ण उपलब्धि हासिल गरेको बताएका हुन्।
मुख्यमन्त्री कार्कीले नेपालको संविधान २०७२ जारी भएपछि २०७४ मंसिरमा प्रदेशसभा निर्वाचन सम्पन्न भई फागुन ३ गते गठन भएको कोशी प्रदेश सरकार आइतवार नवौं वर्षमा प्रवेश गरेको उल्लेख गरे।
सात दशक लामो संघर्ष र ऐतिहासिक जनआन्दोलन २०६२।६३ को जगमा बनेको संघीय लोकतान्त्रिक गणतन्त्र नेपालको संविधानअनुसार प्रदेश सरकार सञ्चालन हुँदै आएको उनको भनाइ छ।
भौतिक पूर्वाधार निर्माणदेखि सामाजिक विकास र नागरिकको जीवनस्तर उकास्न प्रदेश सरकारले उल्लेखनीय प्रगति गरेको दाबी गर्दै उनले कामलाई नजरअन्दाज गरेर नकारात्मक प्रचार भइरहेको टिप्पणी गरे।
वर्तमान परिस्थितिमा पारदर्शिता, जवाफदेहिता, जनमुखी सेवा र सुशासनलाई प्राथमिकतामा राखेर प्रदेश सरकार अघि बढिरहेको उनले बताए।
प्रदेश सरकारले आवश्यक कानुन निर्माण र कार्यान्वयनमा संघीय सरकारसँग सहकार्य, समन्वय र सहअस्तित्वलाई जोड दिएको उल्लेख गर्दै मुख्यमन्त्री कार्कीले ‘प्रदेशले केही गर्न सक्दैन’ भन्ने नकारात्मक प्रचारलाई चिर्दै लगानी सम्मेलन आयोजना गरिएको जानकारी दिए।
सो सम्मेलनमार्फत करिब दुई खर्ब रुपैयाँ बराबरको लगानी प्रतिबद्धता प्राप्त भएको र कार्यान्वयन चरणमा प्रवेश गर्नु महत्वपूर्ण उपलब्धि भएको उनको दाबी छ।
शुभकामना सन्देशमा पर्यटन वर्ष घोषणा, पदमार्ग निर्माण, सडक सञ्जाल विस्तार तथा पुल निर्माणलाई प्राथमिकतामा राखिएको उल्लेख गरिएको छ।
कोरोना महामारीका बेला प्रभावकारी काम गर्दै जनताले अनुभूति गर्ने सरकारका रूपमा प्रदेश सरकारले भूमिका निर्वाह गरेको पनि उनले बताएका छन्।
Discussion about this post