इटहरी : सुनसरी प्रहरीले भारतबाट नेपालतर्फ ल्याउँदै गरिएको ठूलो परिमाणको लागूऔषध ब्राउनसुगरसहित एक जनालाई पक्राउ गरेको छ।
प्रहरी चौकी नरसिंहटप्पुबाट खटिएको टोलीले शनिबार भोक्राहा नरसिंह गाउँपालिका–६ इस्राइल कामत क्षेत्रमा भारतबाट पैदल नेपाल प्रवेश गर्दै गरेका धनकुटा नगरपालिका–१ का ३५ वर्षीय मनबहादुर थापालाई शंका लागेर जाँच गरेको थियो।
शरीर तथा साथमा रहेको सामान खानतलासी गर्दा चारवटा छुट्टाछुट्टै पोकामा लुकाइराखिएको जम्मा १०८.०३ ग्राम ब्राउनसुगर फेला परेको प्रहरीले जनाएको छ।
बरामद पदार्थमध्ये ३८.१३ ग्राम, ३७.३१ ग्राम, ३०.७५ ग्राम र १.८४ ग्राम तौलका चार पोकामा लागूऔषध राखिएको थियो।
प्रहरीले थापालाई लागूऔषधसहित नियन्त्रणमा लिएर जिल्ला प्रहरी कार्यालय सुनसरीमा ल्याएको छ।
बरामद पदार्थको परीक्षण, स्रोत र गन्तव्य तथा लागूऔषध तस्करीमा अन्य व्यक्तिको संलग्नता रहेको वा नरहेको विषयमा थप अनुसन्धान भइरहेको प्रहरीले जनाएको छ।
Discussion about this post