इटहरी : प्रसव पीडामा रहेकी महिलालाई भर्ना नलिएको घटनापछि जिल्ला अस्पताल इनरुवा सुनसरीका निमित्त मेडिकल सुपरिटेन्डेन्ट डा. सन्तोषप्रसाद साहलाई जिम्मेवारीबाट हटाइएको छ ।
कोशी प्रदेश सरकारको स्वास्थ्य मन्त्रालयले घटनाको छानबिन गर्न प्रशासन महाशाखा प्रमुखको संयोजकत्वमा विषयविज्ञसहित पाँच सदस्यीय समिति गठन गरेको छ ।
गत असोज २१ गते राति प्रसूति व्यथाले च्यापेपछि कोशी गाउँपालिका–३ की लालु सदालाई परिवारले जिल्ला अस्पताल इनरुवा पुर्याएका थिए । अस्पतालले भर्ना नलिएपछि विराटनगरस्थित कोशी अस्पताल लैजाने क्रममा उनले एम्बुलेन्समै शिशुलाई जन्म दिएकी थिइन् ।
अस्पतालले आवश्यक कागजात नपुगेको र अवस्था उच्च जोखिममा रहेको भन्दै भर्ना नलिएको परिवारको आरोप छ । आवश्यक परीक्षण र प्राथमिक उपचारसमेत नगरिएको पीडित पक्षको भनाइ छ ।
घटनाको निष्पक्ष छानबिनका लागि निमित्त मेसुलाई जिम्मेवारीबाट हटाइएको मन्त्रालयले जनाएको छ । छानबिनबाट चिकित्सक, स्वास्थ्यकर्मी वा अन्य कर्मचारीको संलग्नता कानुनविपरीत देखिए कारबाही गरिने मन्त्रालयले स्पष्ट पारेको छ ।
Discussion about this post