धरान । धरान–८ चारकोशे जङ्गलस्थित विश्वकर्मा मन्दिर व्यवस्थापन समितिले पहिलो पटक विश्वकर्मा पूजाका अवसरमा सङ्कलित भेटी तथा खर्चको विवरण सार्वजनिक गरेको छ ।
समितिले आइतबार पत्रकार सम्मेलनमार्फत असोज १ गते विश्वकर्मा पूजाका दिन मन्दिरमा सङ्कलित रकमको आय–व्यय सार्वजनिक गरेको हो । समितिका अनुसार पूजाका क्रममा भक्तजनबाट २ लाख ८३ हजार रुपैयाँ भेटी सङ्कलन भएको थियो । त्यसमध्ये ४० हजार ६ सय रुपैयाँ खर्च भएपछि २ लाख ४२ हजार रुपैयाँ बचत भएको छ ।
समितिका अध्यक्ष सुवास श्रेष्ठले विश्वकर्मा पूजा गर्न करिब १५ हजार भक्तजन मन्दिरमा आएको जानकारी दिए । भक्तजनबाट प्राप्त रकममा पारदर्शिता कायम गर्ने उद्देश्यले पहिलोपटक आय–व्यय सार्वजनिक गरिएको उनले बताए । आगामी वर्षदेखि पनि मन्दिरको सम्पूर्ण आय–व्यय सार्वजनिक गर्ने प्रतिबद्धता उनले व्यक्त गरे ।
श्रेष्ठका अनुसार आफू अध्यक्ष भएपछि मन्दिर व्यवस्थापनमा सुधारका काम अघि बढाइएको छ । यस क्रममा प्रवेशद्वार निर्माण गर्नुका साथै ३० वटा गाईबस्तु राख्न सकिने व्यवस्थित गौशाला निर्माण गरिएको उनले बताए । मन्दिरको संरचना र व्यवस्थापनलाई थप व्यवस्थित बनाउने कामलाई निरन्तरता दिने उनको भनाइ छ ।
यसैबीच, मन्दिर व्यवस्थापन समितिले भोटेकोशी बाढीपहिरोबाट प्रभावितका लागि प्रधानमन्त्री उद्धार कोषमा ५० हजार ५०५ रुपैयाँ सहयोग गर्ने निर्णय गरेको छ । अध्यक्ष श्रेष्ठका अनुसार उक्त रकम सुनसरी जिल्ला प्रशासन कार्यालयमार्फत कोषमा पठाइनेछ ।
Discussion about this post