इटहरीमा गजल महफिल

इटहरी : इटहरीमा गजल महफिल कार्यक्रमको आयोजना गरिएको छ ।

डियर कल्याण साहित्य प्रतिष्ठान इटहरीको आयोजनामा शनिबार (आज) गजल महफिल कार्यक्रमको आयोजना गरिएको हो ।

कैलालीका गजलकार दीर्गराज प्रियसी, विराटनगरका हरि कट्टेल र झापाकी लीला अनमोलले गजल वाचन गरेका थिए । उनीहरूले ६–६ वटा गजल वाचन गरे । कार्यक्रम अवधिभर उनीहरूका गजलले वाहवाही पाए ।

प्रतिष्ठानका अध्यक्ष विनोद घिमिरेका अनुसार गजलको उत्थानका निम्ति सो कार्यक्रमको आयोजना गरिएको हो ।

‘पूर्व र पश्चिमलाई जोड्नका लागि पनि यो कार्यक्रमको आयोजना गरिएको हो,’ उनले भने, ‘गजल महफिलमा पश्चिमबाट पनि सुन्नकै लागि पनि अतिथिहरू आमन्त्रित हुनुभयो, उदाहरणीय कार्यक्रमको आयोजना गर्न पायौँ ।’

ठूलो संख्यामा उपस्थित भएका मानिसहरूले कार्यक्रमको उचाई लिएको उनले बताए ।

कार्यक्रममा गजलकारहरूसहित विराटनगर निवासी प्राज्ञ दधीराज सुवेदीलाई सम्मान समेत गरिएको थियो ।

यसअघि पनि विभिन्न साहित्यिक गतिविधि गर्दै आएको सो संस्थाले आगामी दिनमा पनि कार्यक्रमको आयोजना गर्ने जनाएको छ । शनिबारको गजल महफिल एकराज थापाले सञ्चालन गरेका थिए ।