इटहरी : नेपाली कांग्रेस इटहरी उपमहानगरपालिका पार्टी कार्यालयमा लगाएको तालाबन्दी खोलिएको छ ।
भदौ १४ गते मंगलबार पार्टी कार्यालयमा लगाइएको तालाबन्दी आज (सोमबार) खोलिएको छ ।
कार्यबाहक सभापति कोबितजंग कार्कीले नियम विपरीत विभिन्न पदमा मनोनयन गरेको र नगर समितिको बैठक नबसेको भन्दै उपसभापति बालकृष्ण विष्टको नेतृत्वमा तालाबन्दी गरिएको थियो ।
नगर सचिव मन्दीप भट्टराईका अनुसार सोमबार (आज) बसेको नगर समितिको बैठकले कार्यबाहक सभापति कार्कीले गरेका सबै नगरस्तरीय निर्णय फिर्ता लिने सहमति भएपछि तालाबन्दी खोलिएको हो ।
यस्तै, कार्यबाहक सभापति कार्कीलाई फिर्ता बोलाइ सभापति हेमकर्ण पौडेलले नै पार्टीको नेतृत्व गर्ने सहमति भएको छ ।
“कार्यबाहक सभापतिबाट भएका सबै निर्णय फिर्ता गरिएको साथै अब सभापति ज्यू ले नै नेतृत्व गर्ने सहमति भएपछि तालाबन्दी फिर्ता लिएका हौं,” सचिव भट्टराईले भने, “कार्यबाहकले मनोनयन गरेको कोषाध्यक्ष, वडाहरूमा मनोनयन गरिएको भूमि आयोग सम्बन्धि सबै निर्णय फिर्ता लिएपछि सहमति भएको हो ।”
नगर उपसभापति बालकृष्ण विष्टले यसअघि इटहरीका २० वटै वडाका नेता, कार्यकर्ताहरूलाई बोलाएर समीक्षा बैठक राख्नुपर्ने भएपनि स्थानीय निर्वाचन भएको चार महिना बित्न लाग्दा पनि नेतृत्वले वास्ता नगरेको आरोप लगाउँदै असन्तुष्टि व्यक्त गरेका थिए ।
यसअघि कांग्रेस इटहरी सभापति हेमकर्ण पौडेल इटहरी उपमहानगरपालिकाको मेयरमा निर्वाचित भएपछि उपसभापति कोबितजंग कार्कीलाई कार्यबाहकको जिम्मेवारी दिइएको थियो ।
यो पनि – इटहरी कांग्रेसको पार्टी कार्यालयमा तालाबन्दी (भिडियोसहित)
Discussion about this post