इटहरी : लेखक, सामाजिक अभियन्ता तथा राजनीतिक विश्लेषक केशव दाहालको उपन्यास ‘मोक्षभूमि’ माथि तरहरामा चर्चा गरिएको छ । इटहरी उपमहानगरपालिका वडा नं. २० ले आयोजना गरेको कार्यक्रममा यहाँका लब्ध प्रतिष्ठित मानिसहरूको उपस्थिति थियो ।
वडाध्यक्ष मणिराम श्रेष्ठले तरहरा निवासी रहेका दाहालले लेखेको कृति यहाँ वितरण गर्न पाउनु सराहनीय रहेको बताए । श्रेष्ठले भने, ‘वडा नं. २० ले पुस्तक किनेर कार्यक्रममा उपस्थित भएका सबैलाई निःशुल्क रूपमा वितरण गरिएको छ, मानिसमा पढ्ने र लेख्नका लागि उत्प्रेरणा होस् भन्ने उदेश्यले यो कार्यक्रम आयोजना गरिएको हो ।’
तरहरा निवासी रहेका दाहालले लेखेको कृति ‘मोक्षभूमि’ वडाले किनेर यहाँ उपस्थित मानिसहरूलाई वितरण गरिएको थियो । वडा कार्यालयले कला, साहित्यलाई सधैव सकारात्मक साथ दिन तयार रहेको समेत उनको भनाइ छ ।
लेखक दाहालले ‘मोक्षभूमि’ उपन्यासमा विं.सं १२८० देखि ९० को दशकमा रहेर पुरानो मध्ययुगीन सिंजा खस साम्राज्यमा रहेको मानव सभ्यतालाई मैलो बनाउने दासहरूको मुक्तिको गाथा र गरिमालाई चित्रण गरेको उल्लेख गरे । मानिसलाई प्रेरित गर्यो भने लेखन क्षेत्रमा सहज हुने उनको तर्क छ ।
‘गुँड छोडेर उडेको चरो, फेरि आफ्नै गुँडमा फर्किएपछि पाउने प्रेम अपूर्व हुन्छ,’ दाहालले भने, ‘मैले हिड्न, बोल्न, समाज चिन्न, जीवनको रेसमा चल्न सिकेको ठाउँ तरहरा हो ।’
तीन वर्ष लगाएर लेखिएको उक्त पुस्तकले पद्यश्री पुरस्कार समेत पाएको छ । ‘मान्छेको स्वतन्त्रताको चाहनाले मोक्षभूमि निर्माण भयो,’ उनले भने, ‘मान्छेको सर्वोच्चता भयो भने मात्रै मोक्ष हुन्छ ।’
आफूलाई पछिल्लो समय आम पाठकको सकारात्मक प्रतिक्रियाका कारण पनि लेख्नमा उत्प्रेरित गरेको दाहालले बताए ।
आमन्त्रित अतिथिहरूले पुस्तक उपहारस्वरूप पाएपछि हस्ताक्षर समेत गराएका थिए ।
(भिडियो)
Discussion about this post