इटहरीको मुख्य चौकमा राजा वीरेन्द्रको शालिक राख्ने मेयरको अभिव्यक्तिपछि चौतर्फी विरोध

इटहरी : इटहरीको मुख्य चौकमा राजा वीरेन्द्र शाहको शालिक राख्ने भएपछि चौतर्फी विरोध सुरु भएको छ ।

इटहरी उपमहानगरपालिकाका मेयर हेमकर्ण पौडेलले केहीदिनअघि इटहरीको मुख्य चौकमा राजा वीरेन्द्रको शालिक पुनःस्थापना गर्ने अभिव्यक्ति दिएपछि चौतर्फी विरोध सुरु भएको हो ।

मेयर पौडेलले यहाँ शालिक राख्ने अभिव्यक्ति दिएको सार्वजनिक भएसँगै अहिले सामाजिक सञ्जाल तथा विभिन्न संघ, संगठनहरूले विरोध सुरु गरेका हुन् ।

नेपाल आदिवासी जनजाति महासंघ, एमाले निकट विद्यार्थी संगठन, अनेरास्ववियु, माओवादी केन्द्र निकट अनेरास्ववियु क्रान्तिकारी र नेकपा (एकीकृत समाजवादी) निकट अनेरास्ववियूले विरोध जनाएका छन् ।

नेपाल आदिवासी जनजाति महासंघले शुक्रबार मेयर पौडेललाई ध्यानाकर्षण पत्र बुझाउँदै आपत्ति जनाएको थियो ।

देश लोकतान्त्रिक गणतन्त्रात्मक शासन प्रणाली अन्तर्गत सञ्चालित रहेको र नेपाली जनताको निकै लामो संघर्ष र बलिदानबाट प्राप्त संघीयता, गणतन्त्र र धर्मनिरपेक्षताजस्ता महत्वपूर्ण उपलब्धिलाई सँस्थागत गर्ने पहिलो जिम्मेवारी तीन तहको सरकारको रहेको भन्दै महासंघले यी उपलब्धिमा कहिँकतैबाट क्षयीकरण नहुने विश्वास व्यक्त गर्दै महासंघले ध्यानाकर्षण पत्र बुझाएको थियो ।

यस्तै, शनिबार विद्यार्थी संगठनहरूले एक विज्ञप्ती जारी गर्दै विरोध जनाएका छन् । संयुक्त प्रेस विज्ञप्ती जारी गर्दै समाजमा व्याप्त विकृत्ति विसङ्गतिहरूको चिरफार गर्दै जनभावना अनुरुप असल कार्य गर्न गराउन आफूहरूको खबरदारी रहेको बताएका छन् ।

‘इतिहास संरक्षणको नाममा स्थानीय मौलिक कला र लोक सँस्कृति प्रचार–प्रसार र प्रबद्र्धन गर्नुको सट्टा कुनै अमुक व्यक्ति वा संस्थाको मूर्ती चौकको भित्तामा राखेर इटहरी सरकारले के सन्देश दिन चाहान्छ’ विज्ञप्तिमा भनिएको छ ।

अनेरास्ववियू सुनसरी अध्यक्ष अतीतकिरण नेपालले इतिहासप्रति आफूहरूको सम्मान भएपनि चौकमा राजाको मूर्ति आवश्यकता नरहेको बताए । उनले भने, ‘इतिहासको पुनरागमन हैन, प्रगतिशील रूपान्तरण हाम्रो र आजको समयको आवश्यकता हो । इतिहासपति हाम्रो सम्मान छ, तर पश्चगमन तर्फको यात्राप्रति घोर आपत्ति छ ।’

मुलुक संघिय लोकतान्त्रिक गणतन्त्रको स्वर्णीम चरणमा आइपुग्दा समेत कुनै राजाको कृत्रिम मूर्ति व्यस्त सडककोबीचमा खडा गरेर इतिहासको संरक्षण हुने मान्यता राख्नु आफैँमा पश्चगामी कदम भएको विद्यार्थी नेताहरूको भनाइ छ ।

इटहरीमा अहिलेको आवश्यकता सार्वजनिक शौचालय, आकाशे पुल, सीसी टिभी तथा सडक बत्ति जडान गरी हरित नगरी इटहरी बनाउनेतर्फ स्थानीय सरकारको ध्यानाकर्षण हुनुपर्ने अनेरास्ववियु क्रान्तिकारी सुनसरीका अध्यक्ष नवीन दाहालले बताए ।

एमाले सम्बद्व अनेरास्ववियु जिल्ला कमिटीका नवराज खड्का, नेकपा माओबादी केन्द्र सम्बद्व अनेरास्ववियु क्रान्तिकारीका जिल्ला अध्यक्ष नवीन दाहाल र नेकपा एकीकृत समाजवादी सम्बद्व अनेरास्ववियूका जिल्ला अध्यक्ष अतीत किरण नेपालले विज्ञप्तिमा हस्ताक्षर गरेका छन् ।

कतिपयले भने सामाजिक सञ्जालमाफर्त इटहरी उपमहानगरले शुक्रबार मात्रै नीति तथा कार्यक्रममा थारू जाति यहाँको पहिलो नागरिक भएको समेटेका कारण थारूकै प्रतिमा राख्नुपर्ने पनि तर्क गर्दै आएका छन् ।

कतिपय राजावादीहरूले भने शालिकसँग पनि डराउनुपर्ने देश भनेर अभिव्यक्ति दिँदै आएका छन् ।