इटहरी : कोसी प्रदेश नामकरणविरुद्व शनिबार (चैत ११ गते भोलि) प्रदेशभर चक्काजाम गर्ने चेतावनी दिइएको छ ।
गत चैत ५ गते विराटनगरस्थित मुख्यमन्त्री कार्यालय अगाडि कोसी प्रदेश खारेजीको माग राख्दै आन्दोलनमा सहभागी भएका ४२ वर्षीय पदम लिम्बूको मृत्यु भएपछि थप आन्दोलन गरिने चेतावनी दिइएको हो ।
संघीय लोकतान्त्रिक राष्ट्रिय मञ्चका सुनसरी जिल्ला अध्यक्ष अमर इजमले लाजेहाङ लिम्बूको हत्याको अनुसन्धान गर्न छानबिन आयोग गठन गर्न पनि माग गरिएको बताए ।
उनले भने, ‘पहिचानबादीको आन्दोलन शान्तिपूर्ण थियो । पहिचान विरोधी सत्ता, राजनितिक दलको इशारामा भड्काइयो, पूर्वमा अब के हुन्छ यसै भन्न सक्ने अवस्था छैन ।’
लिम्बूको मृत्यु भएसँगै पहिचानवादी संघर्ष समितिले थप आन्दोलनको कार्यक्रम घोषणा गरेको छ । चैत ११ गते दिउँसो १ बजेदेखि २ बजेसम्म प्रदेशका १४ वटै जिल्लामा चक्काजाम गर्ने निर्णय गरेको बैठकको निर्णय छ ।
चैत ५ गते विराटनगरको प्रदर्शनमा सशस्त्र प्रहरीले आन्दोलनकारी माथि निषेधित क्षेत्र नजिक अश्रुग्याँस प्रहार गरेको थियो । लगत्तै हवाई फायर गरेको प्रहरीसँग दोहोरो भिडन्तका बेला लाठी चार्जमा घाइते लिम्बूको टाउकोमा गम्भीर चोट परेको बताइएको छ ।
प्रदेश नं. १ पुनः नामाङ्कन संयुक्त संघर्ष समितिको शुक्रबार बसेको बैठकले थप आन्दोलनको कार्यक्रम घोषणा गरेका हुन् ।
उनीहरूले प्रदेशको नाम कोसी खारेजी गरी ऐतिहासिक पृष्ठभूमि र बहुपहिचानको आधारमा पुनः नामाङ्कनको माग सम्बोधन नगरुञ्जेल र आन्दोलनकारी पदम लिम्बू (लाजेहाङ) लाई राज्यले सहिद घोषणा गरी क्षतिपूर्ति नदिएसम्म मृतकको शव जिम्मा नलिने अडान पनि राखेका छन् ।
संयुक्त राष्ट्रसंघ, मानवअधिकार आयोग, प्रधानमन्त्री, राजनीतिक दललाई ध्यानाकर्षण पत्र दिने पनि बैठकको निर्णय छ ।
यो पनि – कोसी प्रदेश नामकरण विरुद्व आन्दोलनमा घाइते भएका एक युवकको मृत्यु
Discussion about this post