उदयपुर : त्रियुगा नगरपालिका–१२ स्थित जनप्रेमी टोलमा करिब २ सय मिटर सडक ढलान निर्माण सम्पन्न भएको छ । कोशी प्रदेशकी उपसभामुख सृजना दनुवारको पहलमा स्वास्थ्य कार्यालय जाने सडकको ढलान गरिएको हो ।
सडक निर्माण सम्पन्न भएसँगै स्थानीयवासीलाई आवतजावतमा सहज हुने अपेक्षा गरिएको छ ।
विगतमा सडकमा खाल्डाखुल्डी हुनुका साथै वर्षायाममा पानी जम्ने र हिलाम्मे तथा अन्य समयमा धुलाम्मे हुने समस्या रहेकाले स्थानीयवासीलाई आवतजावतमा कठिनाइ हुँदै आएको थियो । सडक ढलान भएपछि उक्त समस्या समाधान हुने स्थानीयले बताए ।
स्थानीय भावना कार्कीले सडक निर्माण सम्पन्न भएपछि दैनिक आवतजावतमा सहज भएको बताए । लामो समयदेखि खाल्डाखुल्डी, धुलो र हिलोमा हिँड्नुपर्ने बाध्यता रहेको भन्दै सडक ढलान भएपछि स्थानीयवासी खुसी भएको उनले बताए ।
वडा नम्बर १२ का अध्यक्ष नवीन राईका अनुसार कोशी प्रदेश पूर्वाधार विकास कार्यालयको बजेटबाट सडक निर्माण गरिएको हो । सडक निर्माणका लागि अघिल्लो आर्थिक वर्षमा २५ लाख रुपैयाँ र त्यसपछि थप १५ लाख रुपैयाँ बजेट खर्च भएको उनले बताए । दुई आर्थिक वर्षमा सडकको निर्माण कार्य सम्पन्न गरिएको अध्यक्ष राईले बताए ।
अध्यक्ष राईका अनुसार अघिल्लो आर्थिक वर्षमा १ सय ९२ मिटर सडक ढलान गरिएको थियो भने त्यसपछिको आर्थिक वर्षमा थप १ सय २ मिटर सडक निर्माण गरिएको हो । दुई चरणमा गरी सडक ढलानको काम सम्पन्न भएको उनले बताए ।
सडक निर्माण सम्पन्न भएपछि कोशी प्रदेशकी उपसभामुख सृजना दनुवारले निर्माणस्थलको निरीक्षण गरेकी छन् । निरीक्षणका क्रममा उनले सडक गुणस्तरीय ढंगले निर्माण भएकोमा खुसी व्यक्त गरिन् ।
स्थानीयवासीको दैनिक आवतजावतसँग प्रत्यक्ष जोडिएको सडक निर्माण सम्पन्न भएपछि टोलवासीलाई सुविधा पुग्ने उनले बताइन् ।
उपसभामुख दनुवारले निर्माण भएको सडकको संरक्षणमा स्थानीय उपभोक्ता तथा टोल विकास समितिको महत्वपूर्ण भूमिका रहने बताइन् ।
सडक निर्माण गरेपछि त्यसको नियमित संरक्षण र उपयोगमा स्थानीयवासीले ध्यान दिनुपर्नेमा उनले जोड दिइन् । सार्वजनिक पूर्वाधार दीर्घकालसम्म टिकाउन सम्बन्धित निकायसँगै स्थानीय समुदायको पनि जिम्मेवारी रहने उनले बताइन् ।
सडक ढलानसँगै स्वास्थ्य कार्यालय जाने बाटोसमेत सहज बनेको स्थानीयवासीले बताए । वर्षायाममा पानी जम्ने र हिँडडुल गर्न कठिन हुने समस्या कम हुने भएकाले सडकले स्थानीयको दैनिक जीवनमा प्रत्यक्ष राहत पुग्ने अपेक्षा गरिएको छ ।
स्थानीयवासीले सडक निर्माणका लागि पहल गर्ने जनप्रतिनिधि तथा सहयोग गर्ने सम्बन्धित निकायप्रति धन्यवाद व्यक्त गरेका छन् । निर्माण सम्पन्न सडकको संरक्षण गर्दै आगामी दिनमा आवश्यक अन्य पूर्वाधार विकासमा समेत ध्यान दिनुपर्ने स्थानीयको अपेक्षा छ ।
Discussion about this post