इटहरीमा ३० जना नगरप्रहरी थपिए

इटहरी : इटहरी उपमहानगरपालिकाले ३० जना नगरप्रहरी नियुक्त गरेको छ । यससँगै नगरप्रहरीको संख्या ४५ पुगेको छ ।

उपमहानगरले एक वर्षअघि नै नगरप्रहरी भर्ना खोलेपनि ऐन निर्माण गर्न ढिलाई भएपछी तालिम सुरु गर्न सकेको थिएन ।

३५ दिनसम्म चल्ने पहिलो चरणको आवासीय तालिममा सहभागी प्रशिक्षार्थीलाई इलाका प्रहरी कार्यालय इटहरीका प्रहरी अधिकृतहरूले प्रशिक्षण दिनेछन् । उनीहरूलाई सैद्धान्तिक र ब्यवहारिक सीप सिकाएर नगरक्षेत्रमा परिचालन गरिने नगरप्रमुख हेमकर्ण पौडेलले जानकारी दिए ।

तालिमको पहिलो चरणमै नगरप्रहरी परिचय तथा मूल्य शिक्षा र संविधान तथा ऐन नियम सिकाइनेछ ।

इटहरी उपमहानगरको नगर प्रहरी व्यवस्थापन ऐन २०७५ अनुसार नगर प्रहरीलाई पालिकाको सम्पत्तिको सुरक्षा र संरक्षण, विभिन्न सभा, समारोह, स्थानीय जात्रापर्वको सुरक्षा व्यवस्थापन, पार्किङ स्थलको रेखदेख तथा व्यवस्थापनको अधिकार दिइने बताइएको छ ।

तालिममा नगर प्रहरीका प्रहरी निरीक्षक, सहायक निरीक्षक, हवल्दार र प्रहरी जवान गरी कूल ३६ जना नगर प्रहरीको सहभागिता छ ।