इटहरी : इटहरीमा रहेको कामधेनु दुग्ध विकास सहकारी संस्थाले काठमाडौँ उपत्यकामा बजारीकरण सुरु गरेको छ ।
संस्थामार्फत उत्पादन हुँदै आएको नौनी घ्यू, चिज, छुर्पी, टेबल बटर, पनिर, खुवा लगायत मिठाइका परिकारहरू उपत्यकाका सहरहरूमा बजारीकरण सुरु गरिएको संस्थाले जनाएको छ ।
२४ वर्षअघि स्थापना भएको कामधेनुले पूर्वी नेपालका बजारहरूमा सहज पहुँच विस्तार गरेसँगै उपत्यका केन्द्रित व्यापार थालेको अध्यक्ष यादप ढकालले जानकारी दिए ।
ढकालकाअनुसार बजारीकरणको पहिलो चरणमा काठमाडौँको चाबहिलमा शीत भण्डार स्थापना गरिएको छ । पाँच टन क्षमता रहेको भण्डारमा दुग्धजन्य सामाग्रीहरू स्टोर गरी काठमाडौँ, भक्तपुर, ललितपुरसहित काभ्रेपलान्चोकका बजारमा विक्री वितरण गर्दै आएको संस्थाका बजार प्रमुख नवराज नेपालले बताए ।
कामधेनुले यस आर्थिक वर्षभित्रमै उपत्यकाका २० मुख्य बजारहरूमा विक्री केन्द्र खोल्न लागेको बजार प्रमुख नेपालले बताए । उपत्यकामासमेत खुल्ला दुग्ध पदार्थहरू जथाभावी बेचबिखन हुने पाइएकाले सरकारले अनुगमन गरी त्यस्ता कार्य निरुत्साहित गर्नुपर्ने उनको भनाइ छ ।
उपभोक्ताले गुणस्तरीय दुग्ध पदार्थहरूको माग अत्यधिक मात्रामा गरिरहेको अवस्थामा उपत्यकामा आइसकेपछि थप हौसला मिलेको दाबी गरे ।
इटहरी उपमहानगरपालिका २० स्थित तरहरामा प्रधान कार्यालय रहेको कामधेनुमा प्रत्यक्ष रूपमा पूर्वका सुनसरी, मोरङ, झापा, धनकुटा, तेह्रथुम लगायत जिल्लाका ११ हजार कृषकहरू आबद्ध रहेका छन् ।
विदेश निर्यातका लागि छुर्पीको सम्झौता
कामधेनुले आफ्ना उत्पादनहरूलाई विदेशसम्म पुर्याउने तयारी सुरु गरिसकेको छ ।
बजारीकरणकै क्रममा सहकारी संस्थाले अमेरिका, क्यानडा, जापानलगायतका देशहरूमा दुग्धजन्य पदार्थहरू निर्यात गर्दै आएको ललितपुरको लेकाली नेपाल प्रा।लीसँग कम्तीमा वार्षिक ५० हजार केजी छुर्पी विक्री गर्ने गरी सम्झौता गरेको छ ।
लेकाली नेपाल प्रालिका म्यानेजर अङ्कित मुन्द्राले संस्थासँग वार्षिक ५० हजार केजी छुर्पी खरिद गर्ने गरी सम्झौता पत्रमा हस्ताक्षर गरेका छन् । संस्थाका तर्फबाट अध्यक्ष ढकालले उक्त सम्झौता पत्रमा हस्ताक्षर गरेका छन् ।
प्रतिकेजी एक हजार तीन सयसम्म खुद्रा मूल्यमा विक्री हुँदै आएको छुर्पी विदेश निर्यात गर्नेगरी सम्झौता हुँदा समग्र कृषकहरूलाई फाइदा पुग्ने अध्यक्ष ढकाल बताउँछन् ।
कामधेनुले आफ्ना उत्पादनहरूलाई नेपालका ठूला सहरहरूमा समेत पुर्याउनका लागि बजारीकरण गर्नु महत्त्वपूर्ण भएको धनकुटाका कृषक भरत गुरुङले बताए ।
पछिल्लो समय कृषकले उत्पादन गरेका दुग्धजन्य पदार्थहरू बिक्री नभएर मिल्क होलिडे भइरहेको समयमा कोशी प्रदेशमा राम्रो हिस्सा ओगटेको कामधेनुले पूर्वमा उत्पादन भएका पदार्थहरू बिक्री गर्दा यहाँ देखिएको समस्याहरू समेत निराकरण हुने गुरुङको विश्वास छ ।
Discussion about this post