इटहरी : नेपालसहित विश्वभरका आदिवासी जनजातिहरूको अधिकार, पहिचान, संस्कृति र अस्तित्वको संरक्षण, प्रवर्द्धन तथा सुनिश्चितताका लागि प्रत्येक वर्ष मनाइँदै आएको विश्व आदिवासी दिवसको ३१औँ संस्करण यस वर्ष पनि इटहरीमा मनाइने भएको छ।
नेपाल आदिवासी जनजाति महासंघ, इटहरी उपमहानगर समन्वय परिषद्को आयोजनामा साउन २४ गते शनिबार साँस्कृतिक कार्यक्रम, झाँकी, ¥यालीसहित उत्सवको रूपमा मनाइन लागेको हो । बिहीबार पत्रकार सम्मेलन गर्दै यसबारे जानकारी दिइएको हो ।
इटहरीको संगीत चोकमा बिहान १० बजे भेला भएर ¥याली निकालिने र पश्चिम लाइनमा गएर कार्यक्रम आयोजना गरिने महासंघका अध्यक्ष चिरहाङ राईले बताए ।
“प्राकृतिक श्रोत, जल, जमिन र जंगलमाथि आदिवासी जनजातिको अधिकार सुनिश्चित गर,आदिवासी तथा जनजातीय जनहरूको अधिकारसम्बन्धी अन्तर्राष्ट्रिय श्रम सङ्गठनको महासन्धि सम्बन्धी सर्वोच्च अदालतको निर्देशनात्मक आदेश कार्यान्वयन गर” भन्ने माग केन्द्रमा राखिएको उनले बताए ।
राज्यले अहिलेसम्म आदिवासी जनजातिको आत्मनिर्णय, भाषा, पहिचान, शिक्षा, स्वास्थ्य तथा स्रोतमाथिको अधिकार सुनिश्चित नगरेको र यसलाई कार्यान्वयन गर्न सभ्य र सम्यम तरिकाले माग राखिने राईले बताए ।
“सभ्य र सम्यम शैलीमा हामी आफ्नो माग राख्छौँ,” उनले भने, “आफ्नो अधिकार माग्नका लागि अरूलाई गाली गर्न हुँदैन भन्ने पनि सन्देश दिन्छौँ ।”
कार्यक्रममा विभिन्न राजनीतिक दलका प्रतिनिधि, नागरिक समाज, समाजसेवी, स्थानीय आदिवासी अभियन्ता तथा सर्वसाधारणको उपस्थिति रहने कार्यक्रमका मुल संयोजक चन्द्रबहादुर तामाङले बताए ।
तामाङका अनुसार दिवसको अवसरमा आदिवासी समुदायका मौलिक पोशाक, नृत्य, गीत, बाजागाजा र परम्परागत कलाको झाँकीसहित ¥याली प्रस्तुत गरिनेछ ।
सांस्कृतिक कार्यक्रमको आकर्षणमा राष्ट्रिय गायक अनिल कोयू राईसहित स्थानीय कलाकारहरूको प्रस्तुति पनि रहने प्रचारप्रसार संयोजक एवम् महासंघका उपाध्यक्ष रोशन भुजेलले जानकारी दिए ।
आदिवासी जनसमुदायलाई आत्मनिर्णयको अधिकार हुने, भूमि, जंगल, प्राकृतिक स्रोतसाधनमाथि परम्परागत हक मान्यता दिनुपर्ने,
शिक्षा, स्वास्थ्य, रोजगारी, संस्कृति आदिमा समान पहुँच र संरक्षण सुनिश्चित गरिनुपर्ने र त्यस अधिकार माग गर्नका लागि यो दिवस मनाइने भुजेलले बताए ।
Discussion about this post