विराटनगर । कोशी प्रदेशका मोरङ, झापा र उदयपुर जिल्लामा भएका विभिन्न सवारी दुर्घटनामा बालिकासहित २७ जना घाइते भएका छन् । असोज १७ गते भएका दुर्घटनामा केही घाइतेको अवस्था गम्भीर रहेको प्रहरीले जनाएको छ ।
उदयपुरको त्रियुगा नगरपालिका–६ चुरिया जंगलस्थित सगरमाथा राजमार्गमा सिटी सफारी अनियन्त्रित भई सडकबाट करिब २०० मिटर तल खस्दा सात जना घाइते भएका छन् ।
गाईघाटबाट लहानतर्फ जाँदै गरेको सफारी दुर्घटनामा चालकसहित चार जनाको अवस्था सामान्य र तीन महिलाको अवस्था गम्भीर रहेको छ । घाइतेहरूको जिल्ला अस्पताल उदयपुरमा उपचार भइरहेको छ ।
त्यस्तै, त्रियुगा नगरपालिका–११ बाबरानी मार्गमा मोटरसाइकलले बाटो काट्दै गरेकी ६ वर्षीया बालिकालाई ठक्कर दिएको छ । गम्भीर घाइते बालिकालाई प्रारम्भिक उपचारपछि थप उपचारका लागि विराटनगरस्थित नोबेल अस्पताल पठाइएको छ ।
मोरङको विराटनगर महानगरपालिका–४ कदम चोकमा नम्बर नखुलेको सवारीसाधनले मोटरसाइकललाई पछाडिबाट ठक्कर दिँदा दुई जना घाइते भएका छन् । मोटरसाइकल चालक २९ वर्षीय दिपेन राई सामान्य घाइते भएका छन् भने पछाडि सवार उनकी ६३ वर्षीया आमा देविमाया राईको अवस्था गम्भीर रहेको छ । ठक्कर दिने सवारीसाधन फरार रहेकाले खोजी भइरहेको प्रहरीले जनाएको छ ।
विराटनगर महानगरपालिका–१९ घडी चोकमा मोटरसाइकलले पैदलयात्रीलाई ठक्कर दिँदा तीन जना घाइते भएका छन् । घाइते हुनेमा पैदलयात्री देवराज भट्टराई, मोटरसाइकल चालक सन्तोष चौधरी र पछाडि सवार सागर चौधरी छन् । तीनै जनाको अवस्था सामान्य रहेको छ ।
मोरङकै सुन्दरहरैँचा नगरपालिका–१० खोर्साने चोकमा बसले कारलाई पछाडिबाट ठक्कर दिँदा मानवीय क्षति नभए पनि कार र बसमा सामान्य क्षति पुगेको छ । बुढीगंगा गाउँपालिका–४ नेमुवा चोकमा मिनी ट्रकमा स्कुटर ठोक्किँदा स्कुटर चालक चन्दनकुमार साह घाइते भएका छन् ।
कानेपोखरी गाउँपालिका–१ मा मोटरसाइकलले साइकलयात्रीलाई ठक्कर दिँदा ६१ वर्षीय राजकुमार चौधरीको दाहिने खुट्टाको बूढीऔँला भाँचिएको छ । धनपालथान गाउँपालिका–४ मा दुई मोटरसाइकल ठोक्किँदा दुई जना घाइते भएका छन् ।
यसैगरी, विराटनगर महानगरपालिका–२ ढाटमा दुई मोटरसाइकल एकआपसमा ठोक्किँदा एक जना सामान्य घाइते भएका छन् ।
झापाको दमक नगरपालिका–३ दीपज्योतिमा मोटरसाइकल र सिटी सफारी ठोक्किँदा मोटरसाइकल चालक सञ्जल राई घाइते भएका छन् । अर्जुनधारा नगरपालिका–८ शनिश्चरे बजारमा सिटी सफारीले साइकलयात्रीलाई ठक्कर दिँदा साइकलमा पछाडि सवार ५४ वर्षीया लक्ष्मी विश्वकर्मा घाइते भएकी छन् ।
गौरादह नगरपालिका–९ मिलन चोकमा सिटी सफारी अनियन्त्रित हुँदा एक जना घाइते भएका छन् भने भद्रपुर नगरपालिका–४ फागो चोकमा स्कुटर अनियन्त्रित भई नालामा खस्दा चालक र उनका ११ वर्षीय छोरा घाइते भएका छन् । बिर्तामोड नगरपालिका–१० गरामनी चोकमा सिटी सफारी दुर्घटना हुँदा एक महिला घाइते भएकी छन् ।
गौरादह नगरपालिका–८ प्रगति चोकमा स्कुटर, मोटरसाइकल र सिटी सफारी संलग्न दुर्घटनामा चार जना घाइते भएका छन् । घाइतेमध्ये दुई जनालाई उपचारपछि डिस्चार्ज गरिएको र अन्य दुई जनालाई थप उपचारका लागि दमकस्थित निम्स अस्पताल पठाइएको प्रहरीले जनाएको छ ।
दमक नगरपालिका–३ डाकिनी चोकमा मोटरसाइकल अनियन्त्रित हुँदा चालक घाइते भएका छन् । दुर्घटनाका बेला चालकले मादक पदार्थ सेवन गरेको प्रहरीको विवरणमा उल्लेख छ ।
प्रहरीका अनुसार तीव्र गति, लेन अनुशासन उल्लङ्घन, चालकसँग सवारीचालक अनुमतिपत्र नहुनु र बाटो काट्दा सावधानी नअपनाउनु दुर्घटनाका प्रमुख कारण देखिएका छन् । केही दुर्घटनामा संलग्न सवारीसाधन तथा चालकलाई प्रहरीले नियन्त्रणमा लिएको छ भने फरार चालक र सवारीसाधनको खोजी भइरहेको छ ।
Discussion about this post