इटहरी : इटहरीमा जारी तीन दिने ‘दोस्रो अन्तरदेशीय साझा रङ्गमञ्च २०८०’ को दोस्रो दिन सोमबार (आज) झापाको दमकस्थित कदम थियटरले आफ्नो प्रस्तुति दिएको छ ।
‘जयमाया आफू मात्रै लिखापानी आइपुगी’ नाम दिइएको नाटक प्रस्तुत गरिएको हो ।
प्रसिद्व साहित्यकार इन्द्रबहादुर राईको कथा ‘जयमाया आफू मात्रै लिखापानी आइपुगी’ लाई सिजन दाहालले नाट्य रूपान्तरण गरी प्रस्तुत गरिएको हो ।
दोस्रो विश्वयुद्धताका बर्मामा बसेका नेपालीहरू आफ्नो ज्यान जोगाउन भारततर्फ प्रस्थान गर्दा बाटोमै प्राण गुमाउनुपरेको दृश्यलाई नाटकमा प्रस्तुत गरिएको छ । नाटकअनुसार नेपाली भाषीहरू बर्माबाट ज्यान जोगाउनका निम्ति उक्त ठाउँ छाडेर हिँड्छन् ।
कोही आसामतर्फ त कोही लिखापानीतर्फ जान्छन् । तर, बाटोमा आइपर्ने व्यवधानहरूको सामना गर्न नसक्दा एकबाहेक सबैले ज्यान गुमाउँछन् ।
नाटककी पात्र जयमाया भने प्रकृतिसँग जसोतसो जोगिएर बस्दा उनी जीवित हुन्छिन् । कलिलो उमेरकी उनले बाटोमै आमालाई गुमाएकी छन् । खोला तर्ने क्रममा ऊसका बा अर्थात् सुबेदारले पनि ज्यान गुमाइसकेका छन् ।
अरु गाउँलेहरू पनि कसैले बाटोमै ज्यान गुमाए त कसैले आफ्नै मान्छेलाई मारेका घटना छन् । तर, यसबेला जयमाया एक्लै छिन् । भर्खरैको उमेरमा जयमायासँग रहरको रेखा छ । रहरको रेखा लम्बिदैँ जाने उमेरमा उनी जीवित भएकी छन् ।
नाटकले आफ्नो थाँतथलो छाड्नु हुँदैन भन्ने सन्देश दिएको छ । बाँच्नेहरू आफ्नै ठाउँमा बाँचे तर मर्नेहरू प्रकृतिका कारण मरेको दृश्यलाई नाटकमा मिहिन ढंगले प्रस्तुत गरिएको छ । मान्छेकै त्रासमा ठाउँ छाडेर हिँडेका मान्छेहरू हावापानी, बाढीपहिरो र प्राकृतिक विपत्तिमा परेर विलिन भएको दृश्यलाई नाटकमा प्रस्तुत गरिएको छ ।
पछिल्लो समय देश छाडेर विदेशिनेहरू बढिरहेको समयमा उक्त नाटकले भने देशमै बस्नुपर्छ भन्ने सन्देश दिएको छ ।
जीवन बरालको निर्देशनमा तयार भएको नाटकमा अनिल दुलाल, आयुुश खतिवडा, जंग मगर, पारुमा राई, पुनम भुजेल, पुष्प राई, भरत मगर, नवीन भण्डारी, नवीन रिजाल, रश्मी उप्रेती, रोशन मुर्मु, विवेक राउत, संचिता लामा र सुष्मा मगरले अभिनय गरेका छन् ।
नेपथ्यमा मञ्च परिकल्पनाकार मनिक शंकर, प्रकाश परिकल्पनाकार दीप खरेल, संगीत परिकल्पनाकार चोमु शेर्पा खुशी, सुवाचन्द्र खरेल र पुष्प राई रहेका छन् भने सुवासचन्द्र खरेल नाटकको सहनिर्देशक रहेका छन् ।
आइतबारदेखि सुरु भएको दोस्रो अन्तरदेशीय साझा रङ्गमञ्चको पहिलो दिन भने भारतको पश्चिम बंगालका रंगकर्मीहरूले नाटक प्रस्तुत गरेका थिए । कृष्णनगर जीवोनेर एकतान, भारतको प्रस्तुति तथा शुभ्रा रोयको निर्देशनमा ‘एकटु अगुन दे’ नाटक प्रस्तुत गरियो । जुन नाटकले दर्शकहरू भावविह्लि बनेका थिए ।
सोमबार (आज) साँझ ४ बजे ‘आरोहण गुरुकुल, विराटनगर’ नाट्य समूहले नाटक ‘नेता जी’ प्रस्तुत गर्नेछ । उक्त नाटक भरत कार्कीले निर्देशन गरेका हुन् ।
यस्तै, कात्तिक २१ गते बिहान ९ बजे र साँझ ४ बजे ‘कलालय इटहरी’ले नाटक ‘शत्रु’ प्रस्तुत गर्नेछ ।
उक्त नाटक भने प्रज्वल पराजुलीले निर्देशन गरेका छन् । यसअघि शुक्रबार र शनिबार सोही नाटक एकीकृत सरकारी कर्मचारी संगठन नेपाल, सुनसरीको आयोजनामा प्रस्तुत गरिएको आयोजक कलालय इटहरीका अध्यक्ष सोनु जयन्तीले बताए ।
यो पनि – इटहरीमा अन्तरदेशीय नाटक महोत्सव सुरु, पहिलो दिन भारतीय रङ्गकर्मीको प्रस्तुत
Discussion about this post