आज मैले तिमीलाई खोजिनँ

किन खोज्ने, के खोज्ने
बिलायौ, तिमी छैनौ
सशरीर र जिउँदो हुँदा
हिजो पटक्कै खोजिएन
आज खोजेर भेटिन्न
नभेटिने र नपाइने चीज
खोज्ने मेरो बानी छैन
खोजेर समय खर्चनु छैन
त्यसैले, बाउ !
आज मैले तिमीलाई खोजिनँ ।

तिमी जिउँदो हुँदा
गाली गरियो, रिसाइयो
यो बूढो कति कराउँछ भनेर
बेअर्थ आज खोज्नुको के अर्थ ?
जिउँदो हुँदा सरापियो
कस्तो किचकिचे भनेर
मान सम्मानको पथ नै बिर्सेर
अपमान गरियो
त्यसैले, बाउ !
आज मैले तिमीलाई खोजिनँ ।

यो देउ, त्यो देउ
भनियो सबै देउ
घर, जग्गा, सम्पत्ति
जीवनभर त्यहीँ भनियो
सबै दियौ
त्यो फगत लाग्यो
तिमीले जीवन दियौ
मलाई धरा देखायौ
त्यो पनि अपुग भएर
तिम्रो खरानी उडाएँ
अनि हावामा बिलायौ
सदासदाका लागि हरायौ
त्यसैले, बाउ !
आज मैले तिमीलाई खोजिनँ ।

सास दियौ, गाँस दियौ
बास दियौ,कपास दियौ
जे थियो, त्यो सबै दियौ
त्यतिले नपुगेर तिमीले
जीवनमा आश दियौ
त्यही आशमा म बाँचिरहेछु
सबै दिएर पनि तिमी छैनौ
भौतारिएर जलेछु
त्यसैले, बाउ !
आज मैले तिमीलाई खोजिनँ ।

ङिच्च हाँसेको
दाँत देखाएको
मुजा परेको अनुहार
सामाजिक सञ्जालमा
तिम्रो र मेरो फोटो हाल्दैमा
तिमी आउने भए
तिम्रा थुप्रै तस्वीर मसित छन्
ती सबै हाल्ने थिएँ
बुढ्यौलीमा खान, लाउन
पानी र औषधि मात्रै होइन
घरमा बस्नसम्म नदिएर
वृद्धआश्रममा लखेट्ने
कुसंस्कारको सिकार बनेको
समाजको सदस्य हुँ म
त्यसैले, बाउ !
आज मैले तिमीलाई खोजिनँ ।