छिमेकी

हाम्रो घरको उचाई नमिलेपनि
परिवारको आकार नमिलेपनि
आयश्रोतको मात्रा नमिलेपनि
आवश्यकता र चाहना नमिलेपनि
हाम्रो मन मिल्छ
हाम्रो व्यवहार मिल्छ
किनभने हामी छिमेकी हौँ

एकअर्कालाई सहयोग गर्न पर्खालले छेकेको छैन
सुख दुःख साट्न घमण्डले रोकेको छैन
रहरहरू साँध नाघेर लहराउन पाएका छन्
पीडाहरू मनको बाँध भत्काएर पोखिन पाएका छन्
किनभने हामी छिमेकी हौँ

मेरो घरको बलेँशी छिमेकीको आँगनमा डुल्छ
मेरो बारीको फर्सी उतैतिर गएर फूल्छ
मेरो खेतको धान
आलीबाट निहुरिएर उतैतिर झुल्छ
तैपनि हाम्रो खेतबारीमा ईष्र्या फलेन
झगडाको बिऊ उम्रिएन

मेरो घरमा के पाक्दैछ ? छिमेकीलाई मतलब नहोस्
छिमेकीको मुख कसरी चल्दैछ ? मलाइ मतलब नहोस्
बरु चासो होस्—
छिमेकीको ढोका किन खुलेन ?
छिमेकीको घरमा आज किन साँझ बत्ती बलेन ?

छिमेकी असल हुनु भनेको
हरेक दिन ताल्चा झुण्डाएर बस्नुपर्ने झण्झटबाट
ढोकाहरू मुक्त हुनु हो

मेरो घरमा पस्ने आँधी छिमेकीले छेकेन भने ?
छिमेकीको छानो उडाएको मेरो मनले देखेन भने ?
हामी कस्तो छिमेकी ?
के का लागि छिमेकी ?

हाम्रो सम्बन्धको उचाई देखेर उचाई बढेन दुश्मनीको
जन्म भएन दुश्मनहरूको
हाम्रो मन फराकिलो भएर नै
साँघुरिन पाएनन् हाम्रा खेतबारीहरू
जग्गा जमिनहरू

वर्षौँदेखि ध्यानमग्न छन्
बारीको साँधमा गाडिएका ढुंगाहरू
त्यसैले हामी
खेतबारीमा शान्त भएर काम गर्छौ
ता कि
साँधमा गाडेको ढुंगाहरूको ध्यान भंग नहोस् भनेर

यदि
मेराजस्तै छिमेकी मेरो देशले पाएको भए ?
हाम्रा साँधहरूजस्तै स्थिर, अचल
मेरो देशका सीमास्तम्भहरू भइदिएको भए ?

म
मेरो देशका लागि
एउटा असल छिमेकी खोजिरहेछु ।
०००