इटहरी : निरन्तरको पानीका कारण इटहरीमा बोराबाँध बाध्न सुरु गरिएको छ ।
इलाका प्रहरी कार्यालय इटहरीका डीएसपी खगेन्द्रबहादुर खड्काका अनुसार इटहरी २, ३, ४, ७, ८, १०, ११ र १२, १७ नम्बर वडाका विभिन्न ठाउँमा दर्जन बढी घरहरू प्रत्यक्ष डुबानमा परेका छन् ।
‘इटहरीको बज्राहामा करीब ६० घर, इटहरी १०, ११ र १२ खनारमा पर्ने करीब दुई दर्जन, इटहरी ८ मा करीब एक दर्जन बढी घरहरू डुबानमा परेको खबर आएको छ,’ खड्काले टाकुरासँग भने, ‘इटहरीको बूढीखोला र टेङ्ग्रा खोलासहित सहायक नदीहरूमा पानीको सतह बढेका कारण थप सर्तकता अपनाउन अपिल गरिएको छ ।’
उनका अनुसार निरन्तरको वर्षाका कारण खतराको सम्भावना भएकाले त्यसलाई मध्यनजर गरेर सुरक्षाकर्मी तयार राखिएको छ ।
यसैबीच टेङ्ग्रा खोलाको बाढी बस्तीमा पसेसँगै इटहरीस्थित कृष्णदल गणका २५ जना सैनिक जवान र इलाका प्रहरी कार्यालयको समन्वयमा कटान नियन्त्रणका लागि बोराबाँध बाध्न थालिएको छ ।
इटहरी विराटनगर लाइनमा मुख्य राजमार्ग नै भएर बग्ने खोलाको सहत बढेसँगै बाँध क्षेत्र कटान गर्न सुरु गरेपछि नेपाली सेनाको टोलीले बोराबाँध बनाउन सुरु गरेको हो ।
खोलाले हालसम्म ३ देखि ४ फिटको बाँध काटिसकेको छ भने खोलामा पानीको वहाव उच्च गतिमा छ । वर्षा भएपछि सुनसरीमा उच्च सतर्कता अपनाउन अपिल गरिएको छ ।
मंगलबार रातिदेखिको अविरल वर्षा रोकिने संकेत नदेखिएपछि प्रशासनले उच्च सतर्कता अपनाउन अपिल गरिएको हो ।
यो पनि – निरन्तरको वर्षाले इटहरीका बस्तीमै पस्यो बाढी, केही ठाउँमा सवारी आवतजावतमा समस्या
Discussion about this post